samla vurdering av småkraftverk i fjærland ... - Luster Energiverk

5.0 Samla vurdringar
Samla vurdering av småkraftverk i Fjærland
Sluttkommentar:
Fjærlandsfjorden og Fjærland er eit internasjonalt kjend reisemål. Landskapet har stor
opplevingsverdi og høyrer til blant dei fremste natur- og kulturlandskapsområda i regionen.
Landskapet i Fjærland er rikt på rennande vatn, både mindre bekkar og elver som renn ned
bratte fjellsider, samlande elvar frå sidedalføre og hovudelvene som fører med seg rikeleg med
smeltevatn frå bremassiva gjennom heile sommarsesongen. Vatnet er eit av dei karakteristiske
landskapselementa som er med å gje Fjærland sin identitet og særpreg.
Ved vurdering av føreliggjande aktuelle utbyggingsprosjekt i Fjærland, vil det vere størst
konfliktpotensial knytt til prosjekt i ytre del av Fjærlandsfjorden (Romøyri og Lidal), samt 2
elveprosjekt inst i Supphelleelvi.
Friluftsliv
Som omtala tidlegare er friluftsliv mange aktivitetar som i ulik grad vert påverka av tekniske
inngrep. Tilrettelagde aktivitetar har eit avgrensa areal som kan omgås, mens aktivitetar knytt til
naturopplevingar vil påverkast av nye tekniske inngrep.
Langs Fjærlandsfjorden er det i dag relativt lite friluftsaktivitet. Det er nokre trimpostar, men elles
er det få som nyttar turstiane oppe i fjella. Det må likevel tas med at noko av friluftskvaliteten i
dette område, er at det er lite tilrettelagt og få folk i området. Det vert viktig at tiltak i dette
område vert gjort skånsamt slik at særeigenskapen i området vert teke vare på. Tilpassing av
anleggsvegar, bygg og tekniske installasjonar til terrenget og vegetasjon vil redusere
påverknaden.
I indre Fjærland bur det meir folk og det er fleire turmoglegheiter i nærområde. Særleg turstiane
opp til stølane er mykje nytta. Fleire av prosjekta vil gå i nærleiken av desse stiane og det er
viktig at det vert teke omsyn til denne bruken. I Supphelledalen går den einaste DNT-merka ruta
i Fjærland og prosjekta her vil gå parallelt med denne stien.
Turisme
Tursimen i Fjærland har vorte viktig og er basert på ein storslagen og kontrastfullt natur. Eit
element i denne opplevinga er kulturlandskapet og busetnaden i denne storslegne naturen. Det
er då den tradisjonelle landbrukskulturen som gjer dimensjonen og ikkje større tekniske anlegg.
Sikring av busetnad og oppretthalding av kulturlandskapet er positivt for turismen, men dei
tekniske inngrepa må gjerast skånsamt og tilpassast topografi og vegetasjon.
Langs Fjærlandsfjorden er det båttrafikken som er viktigast. Grunnen til at turistane tek denne
båtturen er den storslagne naturen og det er særs viktig at inntak og anleggsvegar i minst
mogleg grad vert synleg og dominerande. Plassering i terrenget og revegetering vert viktig.
Stasjonsbygg må tilpassast lokal byggeskikk.
I indre Fjærland er det fleire element som påverkar turistopplevinga. Med bilveg og intenst
kulturlandskap, vert nye tekniske inngrep mindre framtredande. Likevel er det viktig at tiltak opp i
skogbeltet vert tilpassa terreng og vegetasjon. Særleg omsyn må tas i område rundt dei store
turistattraksjonane; Bremuseet, Bøyabreen og Supphellebreen.
67