F:\Botime Design Elvira\Librat - Arct

SHËNDETI MENDOR DHE TË DREJTAT E NJERIUT 45
E DREJTA PER NJE PROCES TE RREGULLT
GJYQESOR
Fatjon HILA,
UET
HYRJE
Koncepti dhe rëndësia e trajtimit të një punimi të tillë
Respektimi i të drejtave të njeriut është një ndër kriteret kryesore që një shoqeri të
konsiderohet demokratike. Të drejtat e njeriut i referohen disa të drejtave dhe lirive bazë të
cilat cdo personi duhet ti sigurohen. Ky koncept është ndër më të rëndësishmit për zhvillimin
e shtetit të së drejtës dhe funksionimin e një shoqërie demokratike. Niveli i respektimit të
këtyre të drejtave është tregues i emancipimit të shoqërisë dhe vecanërisht, shtetit ligjor.
Këto të drejta jo vetëm që shërbejnë si standarte për funksionimin e shtetit të së drejtës
por janë njëkohësisht dhe themelet e shtetit demokratik. Në ditët e sotme respektimi i
tyre është synim jo vetëm i vëndeve si Shqipëria por edhe atyre me një nivel demokracie
tashmë të konsoliduar. Ato përbëjnë objekt të punës të një sërë organizatash
ndërkombëtare si ; Kombet e Bashkuara , Gjykata Ndërkombëtare e Drejtësisë ,
Organizata Ndërkombëtare e Punës , Këshilli i Evropës, Komisioni Ndër-Amerikan i të
Drejtave të Njeriut , Komisioni Afrikan për të Drejtat e Njeriut etj . Të gjithë këto
institucione nxisin shtetet në arritjen dhe respektimin e standarteve sa më të larta në
fushën e të drejtave dhe lirive themelore të njeriut.
Një ndër të drejtat kryesore e cila përbën thelbin e këtij punimi është “ E drejta për një
proçes të rregullt ligjor “. Proçesi i rregullt ligjor i sanksionuar në nenin 42 të Kushtetutës
së Republikës së Shqipërisë dhe 6 të Konventës Evropiane për të Drejtat e Njeriut dhe
Lirive Themelore (në vazhdim do të shkruhet KEDNJ) garanton të drejtën e personave
për dëgjimin dhe gjykimin e drejtë të cështjes nga gjykata.
Administrimi i drejtësisë ka si qëllim shërbimin sa më të mirë ndaj qytetarëve dhe për këtë
arsye cdo individ duhet të njihet me të drejtën e tij për një proçes të rregullt. Po kështu
prokurorët, avokatët dhe juristët në përgjithësi në punën e tyre të përditshme kanë detyrimin
të njohin dhe të respektojnë vec të tjerash, të drejtat e garantuara nga e drejta për një
proçes të rregullt. Gjyqtarët si në cështjet civile ashtu dhe në ato penale duhet të shqyrtojnë
cdo pretendim të palëve në lidhje me këtë të drejtë duke ia nënshtruar atë hapsirës së
vlerësimit që KEDNJ i ka lënë gjykatave të vëndeve duke u siguruar që drejtësia e dhënë
në emër të popullit të jetë si rrjedhojë e një proçesi të rregullt dhe të drejtë gjyqësorë.