März 2023 / Borkum-Aktuell - Das Inselmagazin

Borkum - Aktuell Das Inselmagazin
Ein Woord up platt
Insulanner unner sück
Kennen ji dat Sprökje:
Welke Seejmann liggt bi Nanni in‘t Bedde?
Dat is för dej Lü gaud, dej sück de Namen
van de Oostfreiske Eilanden neit marken
könen: Wangerooge, Spiekeroog, Langeoog,
Baltrum, Norderney, Juist, Borkum.
Verskeiden Mensken wassen daarmit neit
inverstahn. Dat geiht ja van achtern na vörn,
dat mutt andersum. Un uk de Juisters wassen
daar tegen: Unse Eilandname begünnt mit ein
J un neit mit ein I! Dann hebben sück klauge
Mensken ein ander Sprökje utdocht:
Bi jede Noordseejinsel buddeln lüstege
Seejmannen Wattgaten!
Dej Juister Hans Heyken kwamm 1997 drup
- as he van ein Fahrt up Fastland taurügg
kwamm, waar he uk Eilanders van de ander
Insels truffen harr - ein Binanderkomen
van Insulaners in‘t Leven tau raupen, dej
sömmerdags för de Gasten spölen, danzen
un singen. Up alle oostfreiske Inseln gifft
dat Klöttjes un Vereinen, dej dat maken.
Winterdags instudeiern un in de Sömmer
uptreden. Up hör eigen Insels bin seej
bekennt, man unternander harr man minn
Kuntakt. Dat mutt anders, see Hans Heyken.
As ji Lüst hebben, koomt in Vörjahrdag na
Juist un laat uns hier ein geselleg Wekenende
maken.
In‘t erste Jahr wassen dat ruugweg 80 Lü, dej
komen bin. Man dat hett sück gau rumproot,
hau moij dej Dagen west wassen. Dat maken
wi ander Jahr weer, dann is ein ander Insel
dran.
So is dat Fesche upstahn un hett sück neumt:
Insulaner unner sück. Sück kennen lehren,
kieken, wat dej andern so maken, moij binander
sitten un prootjen, ein bitje fieren mit lecker Eten
un Drinken. Elket Jahr up ein ander Insel. Up‘t Ende
wassen dat wall fievhundert Lü, dej komen bin. Dat
is neit so licht för dej Lü, dej dat in Hand nehmen
mutten, um för alle Mensken ein Kamer tau kriegen
un hör wat vörtausetten. Man tiss alltied mitlopen,
Jahr för Jahr.
Un dat was alltied allemachdeg moij. So hett man
dej ander Eilanden kennen lehrt, dej man meisttied
vörtied noch neit seihn harr. Un elke Insel hett wat
Besünders. Die 7 zum Verlieben!
Daar is wat an. Un wat de Mensken all up de Beinen
tillen, daar is man staff. Un fieren könen seej all
mitnander gaud. Dej Nabers, dej vörtied heil minn
mitnander tau daun harrn. Nu wassen dat gaude
Fründen.
Vör dreej Jahr was Börkum weer dran. Dann
kwamm dej elendege Krankte, dej de heile Wereld
dörnander brocht hett. Kein lüttje Saun mehr, even
drücken - all ut! Sück ankieken as Jan van Feern.
Elendeg. Na ja, viellicht taukomen Jahr. Gung weer
in de Büx. Man dit Jahr, 2023, daar komen seej weer
binander. Up Börkum. De Nabers, de Eilanders.
Singen, danzen, lachen, fieren. Völ Aardegkeit un
ein Büllte Pläseier un
Allerbest Jan*
*Jan Schneeberg ist Archivhelfer beim Heimatverein der
Insel Borkum e.V. und verfasst seit 19 Jahren die Kolumne
„Woord up platt“ für Borkum-Aktuell.
Woordverklaren: Sprökje - kleiner Spruch; daar tegen - dagegen; Klöttje - kleine Gruppe;
Vörjahrdag - Frühlingstag; ruugweg - ungefähr; Fesche - Fest; upstahn - begonnen; neumt - wurde genannt;
vörsetten - servieren, anbieten; up de Beinen tillen - organisieren; staff - erstaunt; Saun - Kuss;
Jan van Feern - weit weg stehen; Aardegkeit - Vergnügen; Pläseier - Spaß.
64 64