ACTA APOSTOLICAE SEDIS COMMENTARIUM ... - La Santa Sede

Acta Benedicti PP. XV 101
EPISTOLAE
I
AD R. P. D. ALFREDUM PERI MOROSINI, EPISCOPUM TIT. ARCENSEM: CUI
FACULTATEM FACIT MUNERE ABDICANDI ADMINISTRATIONIS APOSTOLICAE
LUGANENSIS ECCLESIAE.
Venerabilis Frater, salutem et apostolicam benedictionem. - Administrationem
apostolicam Luganensem, quam diu gessisti, tu, sponte
tua, deponere desideras; Nosque, ut id sinamus, enixe postulasti. Optatis
tuis obsistere nequaquam volumus ; quam ob rem, ut memorata administratione
te abdices, ultro permittimus.
Quod quidem dum damus, libet simul solatium Nostrum testari,
quod alter Cardinalium coetus, quem ad causam tuam secundo cognoscendam
destinavimus, te iniustis accusationibus impetitum pronuntiant.
Adsit tibi Deus consolationibus suis, Nos vero coelestium gratiarum
auspicem apostolicam benedictionem tibi peramanter impertimus.
Datum Romae apud sanctum Petrum, die xxix decembris MCMXVI,
Pontificatus nostri anno tertio.
BENEDICTUS PP. XV
II
AD R. P. ALEXIUM MARIAM LÉPICIER, ORDINIS SERVORUM B. M. V. PRIOREM
GENERALEM, EIUS TRACTATUM THEOLOGICUM DE SANCTISSIMA EUCHARI­
STIA DILAUDANS.
Dilecte Fili, salutem et apostolicam benedictionem. — Probe Nos
quidem cognovimus qua tu et diligentia et sanae doctrinae copia et
quanta cum alumnorum utilitate ac doctorum hominum comprobatione
sacram theologiam in urbaniano collegio « Propagandae fidei » multos
annos tradideris. Quod erudiendae iuventutis studium ne tum intermitieres
cum omni tuo esses Ordini praefectus, recte instituisti, conscribendis
de universa theologia libris, alumnis sacrorum longe plurimis
esse adiumento. Huius incepti ac laboris tui fructus cum iam non pauca
edideris volumina, in quibus ea quae ad dogmata pertinent et accurate