ACTA APOSTOLICAE SEDIS COMMENTARIUM ... - La Santa Sede

S. Congregatio Rituum 279
placido ore animam, exhalavit, die 14 ianuarii anno 1853. Exequiis cum
cleri populique frequentia solemniter celebratis et funebri etiam oratione
pronuntiata, Servi Dei exuviae in publicum coemeterium illatae
sunt; et biennio post, civium pecunia oblata, coenobii superiore curante,
in franciscale templum translatae, in digniore conditae sepulchro quiescunt,
prope splendidum altare S. Philumenae Virg. et Mart. sacrum.
Interim fama sanctitatis Servi Dei in vita et post obitum magis in dies
invalescente, Processus Informativus super ea in ecclesiastica Curia
S. iacobi de Chile ordinaria auctoritate confectus est, et ad sacrorum
rituum Congregationem delatus. Instante autem Rmo Patre Francisco
Maria Paolini, Ordinis Fratrum Minorum postulatore generali, attentisque
litteris postulatoriis quorundam Eminentissimorum S. R. E. Cardinalium,
Illmi ac Rmi Domini Archiepiscopi S. Iacobi de Chile una cum
suo Capitulo, aliorumque Archiepiscoporum et Episcoporum praesertim
ex Italiae, Hispaniae et Americae regionibus, necnon superiorum generalium
Ordinum seu Congregationum religiosarum, praeeunte P. Seraphino
Cimino, ministro generali Ordinis Minorum, aliarumque personarum
illustrium, quum, revisione rite peracta super scriptis eidem
Dei Famulo attributis, nihil obstet quominus ad ulteriora procedi possit,
infrascriptus Cardinalis Antonius Vico, Episcopus Portuensis et S. Rufinae,
loco et vice Emi ac Rmi Domini Cardinalis Sebastiani Martinelli,
Causae Ponentis, in Ordinariis sacrae rituum Congregationis Comitiis
subsignata die ad Vaticanum coadunatis, sequens dubium discutiendum
proposuit: An sit signanda Commissio introductionis Causae, in casu et
ad effectum de quo agitur? Et Emi ac Rmi Patres sacris tuendis ritibus
praepositi, post relationem ipsius infrascripti Cardinalis Ponentis, audito
voce et scripto R. P. D. Angelo Mariani Fidei Promotore, omnibus accurate
perpensis, rescribendum censuerunt: Affirmative, seu signandam
esse Commissionem introductionis causae, si Sanctissimo placuerit. Die
24 aprilis 1917.
Quibus omnibus Sanctissimo Domino nostro Benedicto Papae XV
per infrascriptum Cardinalem Sacrae Rituum Congregationi Pro-Praefectum
relatis, Sanctitas Sua Rescriptum eiusdem Sacri Consilii ratum
habens, propria manu signare dignata est Commissionem Introductionis
Causae Servi Dei Fr. Andreae Philumeni Garcia Acosta, laici oblati ex
Ordine Fratrum Minorum, die 25, çisdem mense et anno.
L. © S.
i% ANTONIUS CARD. VICO, Ep. Portuen. et S. Ruf.,
S. R. C. Pro-Praefectus.
Alexander Verde, Secretarius.