ACTA APOSTOLICAE SEDIS COMMENTARIUM ... - La Santa Sede

Acta Benedicti PP. XV 77
XX
DE VEXILLO COHORTIS VULGO « DEI GENDARMI PONTIFICII » NUNCUPATAE,
AUREIS NOMISMATIBUS DUOBUS MANU IPSIUS BEATISSIMI PATRIS DISTINCTO.
BENEDICTUS PP. XV
Ad perpetuam rei memoriam. — Centesimo hodie exeunte anno ab
instituta Cohorte quae « dei Gendarmi Pontifici » vulgo nuncupatur,
saecularia haec sollemnia visum Nobis est peculiari ratione, quantum
per tempora licuit, commemorare, ut neminem lateret, qua Nos voluntate
eos complectamur qui semetipsos operamque suam Romano Pontifici
libenter devoverint. Quare aliis Apostolicis Litteris, hoc ipso die
datis, Pontificiae huius Cohortis ducibus et militibus, quotquot Aedium
Nostrarum securitati in praesenti invigilant, potestatem fecimus gestandi
nomismatis, quod iussu Nostro in fausti diei memoriam signatum est,
largitique praeterea sumus ut concessio huiusmodi Nostra ad accipiendum
emeritum iisdem dilectis filiis perinde valeret atque annus integer in
officio suo insumptus. Verum ne Cohorti tam bene de Decessoribus
Nostris deque Nobis meritae ulla in re deessemus, homines benigno
hodie animo admisimus, et, postquam laetabile eventum gratulati sumus,
gloriosum eorum vexillum, coram positum, nomismatibus aureis duobus
manu Ipsi Nostra distinximus, idest tum eo quod Benemerenti vocant,
tum eo ipso, cuius exemplaria ad duces et milites decorandos, uti supra
diximus, de industria excudi voluimus. Qua quidem de re per has Apostolicas
Litteras placet publice constare, ne, quem militari eiusmodi
signo honorem detulimus, temporum rerumque vices aliquando oblitterent.
Ceterum ornato sic vexillo intellegant milites non modo Cohortem
honestari suam, sed eo etiam, veluti quadam virtutis fideique imagine,
admoneri se, ut et vitam instituto suo dignam agant et observantiam
Romano Pontifici debitam perpetuo servent ac retineant.
Datum Romae apud sanctum Petrum, sub annulo Piscatoris, die xxn
octobris anno MCMXVI, Pontificatus Nostri tertio.
P. CARD. GASPARRI, a Secretis Status.