ACTA APOSTOLICAE SEDIS COMMENTARIUM ... - La Santa Sede

Acta Benedicti PP. XV 263
EPISTOLAE
I
AD R. P. D. TITUM TROCCHI, ARCHIEPISCOPUM TITULAREM LACEDEMONIENSEM,
DELEGATUM APOSTOLICUM CUBANUM ET PORTORICENSEM : QUAE IN PRIMO
CONVENTU ANTISTITUM CUBANORUM DECRETA SUNT, PRAESERTIM CIRCA
SEMINARIUM CLERICORUM, LAUDAT ET COMMENDAT.
Venerabilis frater, salutem et apostolicam benedictionem. — A venerabili
fratre Nostro Sacrae Congregationis Consistorialis a Secretis relatum
Nobis fuit de primo conventu annuo ab Antistitibus Cubanis, sub
finem superioris anni, te Praeside, celebrato. Tu quidem, venerabilis
frater, qui rei totius testis ac moderator aderas, de egregia Episcoporum
voluntate amplissime enarrasti; quam ob rem et Nos minime ambigimus
congratulationem Nostram et laudem eis ultro tribuere ac profiteri.
Nihil enim ipsi habuisse prae oculis videntur, nihil decernendum
censuisse, nisi quod et Dei gloriae et animarum utilitatibus et catholicae
religionis inter suos profectui apprime conferret. Faxit Deus ut
egregiae Pastorum voluntati uberrimi respondeant in gregibus fructus.
Nos autem, quum cetera probamus, tum maxime quae de Seminario
erigendo riteque moderando sapienter statuisti, statutaque ut naviter
exequamini impense commendamus. Nisi etenim sacer clerus numero
atque in primis merito augeatur; aut operarii deerunt qui in messem
Domini mittantur; aut impares reperientur divino operi exercendo.
Spes autem et frequentis cleri et sacerdotum, qui apte ac strenue
in Christi vinea laborent, tota est in sacro Seminario, ubi adolescentium
animi ad sancta rite formentur, tum scientiarum studio, tum
maxime exercitio virtutum. Quae omnia ut pro optatis cedant, tibi et
universis Cubanis Episcopis apostolicam benedictionem, divinarum
gratiarum auspicem et benevolentiae Nostrae testem, amantissime impertimus.
Datum Romae apud Sanctum Petrum, die xxi aprilis MCMXVII, Pontificatus
Nostri anno tertio.
BENEDICTUS PP. XV