Klik hier voor het boek in PDF formaat

Derwijlen Zijn Gen. beleeft hadde up den vergangen wonszdach mij tot sich int
leger te vorderen ende te belasten dat ick den hern wolde angeven daermit voer een
dach vijff ofte ses tijtlijcx alle daege 2000 punt broets ende 2000 krues beers tot
onderholt der Spangiarden gesunden mochte worden, dat ick tselve gisteriges daeges
den hern van Stat ende Lande voergedraegen hadde. Dewelcke, alsoe zij tot allen
tijden guetwillich gewest waeren alles te doene wat in huer vermoegentheit gewest,
soe hadden zij alsnoch dieselve guede wille om tvorsz. broet ende bier te bestellen
voer een dach vijff ofte sees, bevonden sich dannocht in sollicher gestalt dat idt
hemluyden seer beswaerlijck wolde vallen. Neettemin, alsoe Zijn Gen. mij daerbij
oeck angemeldet hadden dat, vermits geen gelt meer voerhanden, het Spansche
volck bij faulte van sulx up den dorpen [100v] solde moeten quartiert worden,
naerdat sollichs dannocht tenderen wolde tot groeter verdarff ende underganck, soe
is dat die hern om sulcken verdarff voer te koemen noch mit lehveringe broets ende
biers wolden doen wat in hunne vermoegentheit is.
Aeverst voer het anderde, alsoe men daegelijcx spoerde dat den vijant uuth den
Soltcamp noch was voertvaerende neet allene die geestelijcke maer oeck der
inwoendern guederen binnen Gronningen in arrest te doene, willende ende
bevelende dat dieselve gebracht solden worden in handen des vijants, soe was die
principael oersaecke waeromme die jegenwoerdige hern tot Zijn Gen. gesunden, dat
men derselven advis solde vraegen, ofte idt neet doenlijk zij—blijvende Sijn Gen.
mit den leger up de plaetze aldaer ende doende tgene den tijt worde mitbrengen—dat
effenswall enich volck gesunden mochte worden om in die Marne den Soltcamp te
besluijten; wente ingevalle sulx neet en geschege, were apparentlijck dat den vijant
alle gewasz der eerden solde doen verbrannen ofte doch alsoe beschaedigen, dat idt
unsz neet tot enich vordel kunste koemen. Up hetwelcke wij dan Zijn Gen. advis
ende guetbeduncken versochten, biddende upt sleunichste darinne te versien.
Nae gedaene proposition antwoerdede Zijn Gen. mit voele woerden, swerende
unsz bij adelijcken ehren, indien Sijn Alteze hem geassisteert hadden in
conformiteijt zijnder eijgen beloften, ofte soe oeck Zijn Alteze up Gelderlant
gekoemen weren, wie men daeraff gesacht und Zijn Alteze selvest beloeft, Sijn Gen.
wolden unsz mit hulpe Goedes van alle unse schantzen soe den vijant in dit quartier
inne heft gevrijet hebben. Seede oeck, der vijant mochte die schantzen Nijenzijll
ende Soltcamp fortifieren soe voele hij wolde, hij konde sie altijd wal gewinnen met
het groff geschutt, wente hij hadde nu geseen wat die nije eerde konde holden, als
men mit cartouwen daeran begunste te breecken; verhaelende meer andere dingen
vant vertreck des hertogen toe Parma.
Belangende averst unse propositie seede Zijn Gen. sollichs alsoe te willen
effectueren, darmit den Soltcamp möge besloeten worden, noemende enige plaetzen
daermen voereerst het volck solde leggen, unsz vraegende ofte wij lever grave
Harmen, oder averst den leutenant Cocquel wolden daertoe gebruijcken. Jedoch Zijn
Gen. sachte, derwijlen Cocquel reedes int lant alhier gehijlckt 1 mocht men denselven
nehmen.
Boeven dat seede Zijn Gen. noch vant casseren der sauvegarden stille te
swijgen, dan men mochte wel mandaten laeten uuthgaen dat niemants den vijant
soude verborgen houden in sijne behuijsinge ende dat bij lijves straffe.
1 Antonie de Cocquel is gehuwd met een dochter van Egbert Clant van Uithuizen.
157