Klik hier voor het boek in PDF formaat

Ick hebbe bij den samtlichen hern oeck rapport gedaen van der intentie des hern
statholders um te verreisen nae Hoeve. Jedoch bij den samtlichen heren is besloeten
dat ick Sijn Gen. voer antwoert solde inseggen dat die heren neet noedich erachteden
Sijn Gen. iemants te adjungeren; stelden die saecke Zijn Gen. in handen.
[25 september 1590]
Martis 25 septembris
Dinxdach den XXV ten septembris sint die heren Con. Mat. leutenant ende
hoevetmannen mit den verordenten der Omlanden bij den erb. Raeth up den
raethuijse gekoemen, alwaer van den official geproponirt dat der veendrich up den
Delffzijll oft nije gecoeren hopman Hillebrant Engelberts alhijr verschreven um zijn
eedt te doene, dat daeromme den heren geleven [117v] wolde daervan te spreecken
in wat fuege sollichs te doene. Ende als nae lange discours hinc inde besloeten dat
men den eedt upt papijr solde brengen, is sollichs van den secretario Popco Everardi
gedaen, ende daerup is Hillebrant Engelberts ingevordert ende hem duer den heren
leutenant Gouda den eedt gestaevet. Hij is oeck vermaent worden zijne soldaten in
guede disciplin te holden ende geen vromde koepman te beschaedigen, dan guede
neersticheit plegen darmit etwesz ingehaelt ende dese Stat daerduer gevictualiert
mach worden.
An den avent heft der heer statholder mij boede gesonden umb int hoff te koemen.
Alwaer Zijn Gen. mij erstlich gevraecht waeromme ick tegens vijff uhren aldaer
gewest were. Ick seede dat die heren begeren wolden Zijn Gen. solde enich volck up
Winsumersijl, Winssum ende Underendam laeten koemen um daerduer te beletten
het wechhaelent des bestials. Twelck Zijn Gen. geaccordiert ende mij daernae
begunst te seggen ofte vraegen, oft wij den hopman Hillebrant Engelberts den eedt
gestaevet hadden. Ick antwoerde: Jae. Sijn Gen. sachte, hij hadde sollichs wall
gehoirt, dan ofte wij wal gedaen hadden, hem daervan neet te seggen ofte daerbij te
roepen. Die verachtinge die men hem deede was voel te voele; het deede een eerlich
man wie in harten, mit meer andere gelijcke woerden. Als ick averst repliceerde
dattet uuth geen verachtinge geschiet waere, dan dat idt alsoe voerhen oeck geholden
weere, seggende dat Herema den eedt gestaevet was van borgermeister Ballen als
borgermeister in der tijt, ende Christoffer Jurgens van leutenant Mepsche, ende alhijr
der leutenant ende hoevetmannen oeck present gewest, seede Sijn Gen. wijders, hij
mochte wel absent gewest hebben, jetzt averst zij hij present ende ofte men dan meer
respect droech tot den leutenant Mepsche. Ick antwoerde: neen, dan alleene dat die
heren sich desz neet wijders bedacht hadden, seggende, het zij te bevoeren alsoe
geholden. Sijn Gen. seeden ende beval mij pro conclusione den hern an toe seggen
dat hij Hillebrant Engelberts neet gedachte voer een capitein te holden, wolde oeck
van der schantze up den Delffzijl geen sorge draegen.
[26 september 1590]
Mercurij 26 a septembris
Wonsdach den 26 septembris hebbe ick den hern van den erb. Raedt dit alles
voergedraegen, die sich daerup voer hoere personen verclaerden, dat zij wal lijden
mochten dat in bywesent Zijnder Gen. hem hopman den eedt verneuwert wurde.
Jedoch men mochte sulx der lantschap oeck oepenbaren.
187