REPUBLIKA E SHQIPËRISË Studimi Demografik dhe ... - INSTAT

Kur kombinohen fëmijët që ushqehen me gji dhe ata që nuk ushqehen me gji, shihet se
shumica e fëmijëve në moshën 6-23 muaj nuk ushqehen në përputhje me rekomandimet IYCF. Vetëm
19 përqind ushqehen sipas tri praktikave IYCF. Përqindja e fëmijëve që merr ushqim minimumin e
herëve apo më shumë në ditë dhe përqindja që ushqehen në përputhje me tri praktikat IYCF rritet me
moshën e fëmijëve deri në 11 muaj dhe pastaj bie mes fëmijëve në moshën 18-23 muaj. Vajzat kanë
më pak gjasa se sa djemtë që të ushqehen sipas tri praktikave IYCF të rekomanduara. Po kështu,
fëmijët në zonat rurale kanë më pak gjasa se sa ata në zonat urbane që të ushqehen në përputhje me tri
praktikat IYCF të rekomanduara.
164 | Të Ushqyerit
11.1.5 Ushqime dhe Lëngje të Konsumuara nga Femrat
Të ushqyerit e përshtatshëm i nënës është i rëndësishëm si për shëndetin e femrave ashtu dhe
për shëndetin dhe zhvillimin e fëmijëve të tyre. Tabela 11.6 paraqet informacion nga nënat me fëmijë
nën tre vjeç mbi ushqimet dhe lëngjet që ato kishin konsumuar gjatë periudhës 24-orëshe përpara
studimit. Informacioni mbi modelet e të ngrënit të nënave shërben si masë e dobishme për të vlerësuar
cilësinë e dietave të nënave.
Rezultatet në Tabelën 11.6 tregojnë që në ditën dhe natën përpara intervistës, më shumë se
nëntë në dhjetë nëna kishin konsumuar ushqime të bëra nga drithërat, mishi, peshku (përfshi
molusqet), shpendët apo vezët dhe djathi e kosi. Konsumimi i mishit, peshkut, shpendëve dhe vezëve
është posaçërisht i rëndësishëm sepse këto ushqime janë burime të mira proteinash dhe hekuri. Dyzetë
e pesë përqind e femrave raportuan se kishin ngrënë ushqime të bëra me vaj, yndyrë, apo gjalpë dhe
56 përqind kishin konsumuar ushqime me sheqer. Tridhjetë e tre përqind e nënave nuk kishin
konsumuar qumësht apo produkte qumështi (burime të rëndësishme kalciumi) dhe 34 përqind nuk
kishin ngrënë fruta dhe perime të pasura me vitaminë A.
Duke shqyrtuar diferencialet në Tabelën 11.6, vihen re variacione të vogla sipas moshës dhe
vendbanimit urban-rural në përqindjen e femrave që konsumojnë ushqime me prejardhje nga drithërat,
rrënjët dhe zhardhokët, bishtajat dhe arra/lajthi/bajame, vaj, yndyrë apo gjalpë dhe çaj apo kafe. Më
shumë variacione vërehen sipas indeksit të pasurisë në përqindjen e femrave që konsumojnë fruta dhe
perime të pasura në vitaminë A, fruta dhe perime të tjera, djathë dhe kos, mish, peshk apo molusqe,
shpendë dhe vezë. Konsumi i ushqimeve me sheqer varion dukshëm sipas indeksit të pasurisë, ku
femrat në indeksin më të lartë kanë thuajse dy herë më shumë gjasa për të konsumuar ushqime me
sheqer se sa femrat në indeksin më të ulët të pasurisë.