Portret Magazine No16

Инспирација
Кој совет би им го дале на девојките кои сакаат да почнат
свој блог?
На девојките кои имаат желба да почнат блог би им
препорачала да се стремат кон остварување на повисоки
амбиции преку него. Блоговите треба да служат и како
дневници, но и како портфолија што овозможуваат приказ
на талентите, вештините и ставовите и само на тој начин
можат да прераснат во валиден моден извор и да доведат
до работа.
Која е вашата динамика на објавување постови, еднаш или
двапати неделно, поретко?...
Нови содржини на „After Two Five“ има три до четири
пати месечно, затоа што поважен ми е квалитетот, отколку
квантитетот. Но, затоа, социјалните мрежи, а особено
профилот на „Инстаграм“ (@jovanazuka), ги ажурирам
речиси секојдневно.
НАЈМНОГУ ГО САКАМ ПРОЦЕСОТ НА СОЗДАВАЊЕ
СОДРЖИНА. ВКЛОПУВАЊЕТО НА СТАЈЛИНГОТ
СО ЛОКАЦИЈАТА, ФОТОГРАФИРАЊЕТО,
ОДБИРАЊЕТО И СРЕДУВАЊЕТО НА
ФОТОГРАФИИТЕ И СКЛОПУВАЊЕТО ВО ЦЕЛОСНА
ПРИКАЗНА. НАЈГОЛЕМ ПРЕДИЗВИК МИ Е ДА
НАЈДАМ СЛОБОДНО ВРЕМЕ И ВРЕМЕ ЗА СПИЕЊЕ.
Како што веќе спомнавме, покрај стилот и модните
комбинации, речиси еднакво важна е и добрата фотографија
за еден моден блог. Што прави една фотографија посебна?
Моќта да ги предизвика вистинските чувства кај гледачот и да
поттикне инспирација без никакво текстуално објаснување.
„After Two Five“, на некој начин, е симбиоза од вашиот стил,
вашата модна приказна, но раскажана преку објективот
и фотографијата на вашето момче. Како влијае тоа на
професионалната соработка меѓу вас двајца? :) А и на
крајниот резултат?
Кога не се работи за приказна на која имам работено како
фотограф, стилист или креативен директор, објективот му го
предавам на Андреј, затоа што имаме потполно иста естетика
и затоа што има дистинктивно чувство за фотографија. Во
меѓувреме, заедно работиме не само на „After Two Five“ туку
и на многу други проекти поврзани со неговата професија.
Сè е многу природно.
Кај нас, блогерството (за жал) се смета за хоби и е
надополнување на другите обврски од 9 до 17 часот,
за разлика од светските блогери, кои живеат, творат,
создаваат, се самофинансираат и се претопуваат во блогот
со нивно име. Што мислите дека е причината за ваквата
разлика?
Причината е едноставна, економските услови во Македонија
не можат да се споредат со условите во поголемите и
значително побогати земји. Нема луксузни брендови и
доволно публика со голема финансиска моќ, нема буџети
за посмел маркетинг и фокусот сè уште е насочен кон
традиционалните маркетинг-канали.
Што мислите, кои се најпотценетите парчиња во машката и
во женската мода?
Чорапите беа мошне потценети, но моменталните трендови
им придадоа значење и ним, особено преку чизмите во
облик на чорапи на „Vetements“.
Кој тренд би сакале да се врати?
Сите трендови се враќаат. Модата е голема машина за
креативно рециклирање, фигуративно и буквално.
Според вас, што е must have за сезоната пролет/лето пред
нас?
Повеќе меѓусебна поддршка, помалку негативност и нови
варијанти на стандардните кошули, со голи рамена или
грб, со копчиња настрана, наместо напред, десет броеви
поголеми, со исечени ракави и со многу, многу карактер.
Првото нешто што го забележувате во изгледот на другите е...
Појавата во целост, движењето, ставот и начинот на носење
на облеката.
Вашата желба за патувања е лесно видлива преку постовите
на блогот. Правите ли паралели и разлики помеѓу местата
што ги посетувате? И иако претпоставувам ќе биде тешко
да се одлучите, кои три дестинации би ги издвоиле како
места што мораат да се посетат?
Секоја дестинација е посебна и има нешто специфично и
неспоредливо со друга и тоа е еден од најубавите делови
од патувањата. Имам уште многу за откривање, но од
местата што ги имам посетено досега, би ги издвоила
Сицилија, Порто и Копенхаген, како локации и искуства што
дефинитивно морам да ги повторам и, како бонус, Њујорк е
град во кој секако повторно би живеела.
Што во моментот се наоѓа на вашата полица, плеј-листа и во
домашната кинотека?
Со нетрпение чекам да ми пристигне книгата „Democratize
Creativity: A Middle Finger in the Shape of Words to Whoever
Told You That You Are Not Creative Enough“, што ја напиша
една од моите најдобри другарки од факултет и на која
сум многу горда. Слушам многу музика и многу поткасти
како „Pardon My French“ на Гаранс Дор, „Fashion No Filter“
на Камил Шариер и Моника Ејнли и „Girlboss Radio“ на
Софија Аморусо, меѓу другите. Од сериите, во последно
време најмногу впечаток ми оставија „Better Call Saul“, „The
Missing“, „Walking Dead“ и „Good Behavior“, а ако почнам да
набројувам и филмови, листата ќе биде многу, многу долга.
Во која насока сакате да го водите блогот во иднина? Имате
ли веќе зацртани проекти, планови и ангажмани за оваа
година?
„After Two Five“ созрева и се менува паралелно со мене.
Приказните поврзани со мојот личен стил и соработките
со брендовите сакам сè повеќе да ги урамнотежувам со
едиторијал-содржина, фотографирана и стилизирана
од моја страна. Личните стилски постови се реалноста,
модните едиторијали се фантазијата, а заедно се модната
симбиоза што ја сакам и многу работам за да ја постигнам.
37