AA REISIGER HERFS 2021

Oaklaan
Die Cullinan-omgewing
Gauteng
NUUT OP DIE DORP
Ek en my man, Hancu, arriveer Vrydag
laatmiddag by ons verblyf, 117 on Oak.
Dit is in die bekende Oaklaan, die
straat waar die meeste van die dorp se
restaurante en winkels geleë is. Maak
net seker jy kom kuier oor ’n naweek.
Die meeste toeristeaantreklikhede
is toe in die week en restaurante
sluit al vroegaand hul deure.
“Ons winkels kan wispelturig wees,”
sê ons gasvrou by 117, Lize-Mari
Pistorious. Lize-Mari, Jacques en hul
kinders woon al twee jaar op die dorp
en kom oorspronklik van die Noord-
Kaap af. Jacques doen aankopebestuur
vir die myn en Lize-Mari het ’n
agtergrond in gasvryheidsbestuur,
’n talent wat jy dadelik opmerk.
Die drie private eenhede is stylvol
en prakties. Lize-Mari het aan alles
gedink wat jy moontlik nodig sal hê:
’n klein yskas, haardroër, eetgerei,
luukse toiletware, beskuit vir jou
koffie, ’n glasie sjerrie en sjokolade.
Soggens laai sy ’n ontbytmandjie
op jou stoep af: varsgebakte
piesang-muffins, skons met spek
en roomkaas, vars vrugteslaai met
jogurt en muesli en ’n sterk koppie
boeretroos. Die tariewe is heel billik.
“ ’n Mens kort dan en wan ’n
bederfie wat nie die bank breek nie.
Almal verdien dit,” sê Lize-Mari.
117 on Oak se tuin is spoggerig,
met rose en laventel wat pronk al om
die 100 jaar oue huis en buitekamers.
Jacques en Lize-Mari het 70% van die
restourasiewerk self gedoen. “Ons is
suckers vir ou goed en lief daarvoor om
dit te herwin – die helfte van ons tuin
kom van die vullishoop af,” sê Lize-Mari.
Dit is dan goed hulle woon nou in
Cullinan, hier is pandjieswinkels en
oudhede om elke hoek en draai.
Ons sluit ons Vrydagaand af by
nog ’n nuwe-ou plek. ’n Paar tree in
die straat af staan die St. George’s-
Anglikaanse Kerk wat deur die Britse
argitek sir Herbert Baker ontwerp
is. Vandag is dit bekend as @Church
Wedding Venue, met ’n restaurant,
kroeg en ’n kunsuitstalling in die
statige sandsteengebou wat verlede
jaar langs die kerk opgerig is.
Ná ’n pizza en glas rooiwyn
stap ons terug na 117 toe.
>
25
HERFS 2021 | AA Reisiger