Flensburg Journal - 235 April 2022
Sie wollen auch ein ePaper? Erhöhen Sie die Reichweite Ihrer Titel.
YUMPU macht aus Druck-PDFs automatisch weboptimierte ePaper, die Google liebt.
OPSNAPPT
... un allens op Platt!
Vagels kieken
Man, wat is dat buten för en Wind!
Un dat regent as dull, ik mag gor nich
vör de Döör. De Vörgoorn liggt vull mit
dicke Twiegen, de de Störm in de letzte
Nacht daalreten hett.
Man denn kiek ik rut na mien Appelbööm,
de jüst in’n Ogenblick ok Foder
för all de Vagels in de Twiegen hebbt. Un
foorts bün ik beter toweeg. Wat en Gefladder
un Hen- un Herflegen, Picken un
Hüppen! En Dutt Lünken sitt op’n Grund
un pickt na de Resten vun Sünnenblomenkarns.
Dree Gröönfinken sünd in’t
Vagelhuus togang. Fief Blaumeisen
arbeidt sik an de leckern Kugeln af. Un
wat is dat denn? En smucke bunte Vagel
kickt sik dat Spektakel an – dat is
en Boompicker, op Hoochdüütsch heet
he „Specht“. De plattdüütsche Naam
gefallt mi egentlich veel beter. He is en
beten kabarietsch, de annern Vagels
sünd eerstmal weg. So kann he sik in
Ruh sattfreten.
Un süh, nu kummt noch en lütte een
mit en rode Bost un sett sik en beten
tögerlich an de Kant vun dat Vagelhuus.
En Meis kummt dorto un dat
süht meist so ut, as wenn de beiden
mit enanner snacken doot.
Dat maakt mi so richtig Spaaß, de bunte
Sellschop antokieken. Bald is Oostern
– un ik heff dacht, nu is bald noog
mit dat Vagelfodern. De schüllt nu bald
mal sülven söken. Dat gifft ja Lüüd, de
seggen doot, man schall dat ganze
Johr hendör wat streuen för de Vagels.
Ik weet nich so recht, wat stimmen
deit. Aver denn denk ik mi, en poor Weken
lang schüllt se noch wat kriegen,
dormit se Knööv hebbt to’n Eierleggen
un Vagelkinner groot trecken. De
Vagelhüüs sünd al torecht för de Kinnerstuven.
Kann also bald losgahn. Un
wenn denn de lütten Meisen dat Flegen
öövt, denn freu ik mi, dat keen Katt in
de Neegde is.
Later is denn Swulkentiet, man dat
duert noch en beten.
Nu schall man eerstmal en flietige
Oosterhaas kamen, dat schall en beten
wärmer warrn un nich so veel Regen
geven. Dat dörv man sik villicht
doch mal wünschen in düsse Tiet!
Marianne Ehlers
Illustration: Laura Becker, www.hallobeckerei.de
32 FLENSBURG JOURNAL • 04/2022