Odolaren mintzoa - Euskaltzaindia

Xalbador bizikletan
Hemeretzi mende eta berrogoi eta bateko,
sujeta ez da errexa aipatu gabe uzteko.
Publikatzea bere gostuz dakienari doako,
pertsu hauetaz zertaz den kasua dautzuet esplikatuko.
Entzun duzue engoitik ixtripu horren omena:
nor den da bizikletatik Okozen erori dena.
Orai artean ene ustez ziklista nintzan lehena,
bainan ardura tronpazen da sobera ausarta dena.
Beraz, aurtengo urteko buruilaren lehenean,
Donibanetikan goiti, arratsaldea apalean,
airos heldu nintzalarikan bizikletaren gainean,
Luzifer Okozen guardian zagon bide bazterrean.
Erran dezadan Birjina Maria ere han zela,
ni pasatu lanjerrean galdua nintzan bertzela.
Ene maxinan murruer buruz juanki tximixta bezala,
uste bainuen heien artean betikotz sartzen nintzala.
Zorionez izan dira, ikusiz ene manera,
bihotz oneko jendeak jinak ene altxatzera.
Erremersiatzen zaituztet ahalaren arabera,
hil ondoan har zitzaitela Jainkoak bere aldera.
Enetzat oren goxoa hau etzitaken nehundik:
lurrean zabal zabala ukaldiaren ondotik.
Ezagutza faltatzen ari, tormenta lotu burutik,
memento batez uste nuen baninduala mundutik.
291