Portret Magazine No 25

АЛЕКСАНДРА КОСТАДИНОВСКА
ПРОЦЕСОТ НА ФОТОГРАФИРАЊЕ ЈА
МЕНУВА СОСТОЈБАТА НА УМОТ
Пред околу осум години, љубопитноста за апаратот на
нејзиниот татко, на некој начин ја предодредила идната
опсесија на фотографката Александра Костадиновска. По
првиот контакт со апаратот „Кодак“, многу брзо открила
како да ги менува фокусот и експозицијата, навлегувајќи
сѐ повеќе во можностите што ги нуди тој. „Како интроверт,
многу ми беше значајно што најдов друг начин на
изразување, покрај зборовите. Едноставно, се чувствував
удобно со апаратот во рака и никогаш не го оставив“, вели
таа.
Фотографира веќе осум години, а професионално со
фотографија се занимава околу три години. Вели дека
процесот на фотографирање ѝ ја менува состојбата на
умот, се чувствува слободна, исполнета, како да е таму каде
што треба да биде. „Тоа е причината поради која научив
да уживам во сопственото друштво. Со апаратот растам,
созревам и се градам себеси. Би фотографирала секој
ден, по цел ден ако треба. Само патувањата и музиката
ме исполнуваат еднакво, но за среќа, многу често ги
комбинирам“, додава Александра.
Сака да фотографира работи што ја прават среќна,
зачувувајќи ги во форма на фотографија. Независно
дали станува збор за луѓе или за пејзаж, таа преку своите
фотографии сака да пренесе топлина и смиреност, што
вели дека не ги наоѓа во Скопје, но затоа европските
градови ја инспирираат и прават да застанува на секои пет
метри за добра фотка. Како едно од најомилените искуства
го издвојува ланскиот „Таксират“, бидејќи, според неа, не
постои посовршена професија од фестивалски фотограф.
Александра работи во „Reborn“, а нејзини фотографии
досега се објавени во магазинот „Lumen“, „Future Now“,
како и на станиците на „Портрет“. Периодов се подготвува
за својата прва, како што самата вели, нетипична изложба
на која вети дека ќе нѐ покани. Attending!