Portret Magazine No 33

Портрет мода
ракави и класичните здодевни панталони на тенисерите,
не се ограничува на елеганцијата на своите потези, копнее
за свежина во спортскиот изглед на терен. Идејата е
едноставна: да се скратат ракавите на кошулата за им се
даде слобода за движење на рацете; да се задржат јаките
за да остане неопходната елеганција. Преку ноќ настанува
револуција. Во 1933 г. се раѓаат поло-маичките на кои првпат
ќе се најде логото со крокодил дизајнирано од страна на
пријателот на Рене, Роберт Џорџ, неколку години претходно
и веќе заштитен знак на Рене на теренот. Идејата логото да
биде видливо е уште еден новитет: ако дотогаш името на
брендот сошиен од внатрешната страна значело гаранција
за квалитет, сега вака видливо значи идентификација за
стил. L.12.12 е првиот модел кој дефинира сѐ што и денес
значи брендот: префинета ткаенина petit piqué, едноставни
линии, комотна елеганција и, се разбира, L за името на
виновникот - Лакост.
Иако во изминатите 85 години со еволуирањето на
модните стилови еволуира и познатата маичка, методите
на производство остануваат непроменети. Петте чекори
низ кои поминува процесот на создавање (плетење, боење,
сечење, шиење на логото со ништо помалку од 1600 конци
и спојување на одделните делови) бараат прецизност,
професионалност и внимателност на деталите, правејќи
ги сите обиди за копија видливи и неуспешни. Во првиот
каталог од 1933 година влегуваат неколку различни
модели, смислени за играчите на тенис, но и за голф, поле
на кое брендот го добива и првиот крокодил-амбасадор,
и тоа жена. Честа ја има Симон де ла Шам, повеќекратен
француски шампион во голф, а подоцна и сопруга на Рене
Лакост. Заедно со нивните три сина и ќерка ќе ја кренат
на нозе семејната империја чии маички ќе го освојат
светот. Во педесеттите години визијата на „Лакост“ е да
го обои секојдневието лансирајќи ги еднобојните маички
во најразлични нијанси, а подоцна и на риги. При крајот
на деценијата доаѓа на свет и првата детска колекција.
Инвентивноста на Рене Лакост не запира на маичките,
тенисот ќе го памети и по револуционерната идеја да ги
замени дрвените рачки на рекетите со челични, изум кој е
патентиран во 1963 година. Седумдесеттите години брендот
ги одбележа со интензивните меѓународни рекламни
кампањи кои ги промовираат францускиот беспрекорен
стил и филозофијата на крокодилот насекаде низ светот,
добивајќи свои приврзаници меѓу богатите и славните. Со
растењето на профитот се зголемува и асортиманот на
производи, вклучувајќи модни додатоци од кожа и парфеми,
кон кои при крајот на осумдесеттите се придружуваат
очилата за сонце и патиките за тенис.
По смртта на Рене Лакост брендот прави постојани
напори да не скршне од неговите основни вредности и
идеали, учествувајќи со Лакост-фондацијата во проекти за
социјална интеграција на ранливите категории преку тенис
и голф, гласно борејќи се за заштита на животната средина
и животинските видови што се во опасност и внимателно
избирајќи ги своите „крокодили“ и вредностите што тие
ги промовираат. Последниот од нив е Новак Ѓоковиќ, кој
исполнувајќи ги критериумите на Рене Лакост за фер игра,
елеганција и истрајност, од 2017 г. е новото заштитно
лице на брендот. По повод 85 години постоење, „Лакост“
годинава лансира капсула-колекција. Сконцентрирана во 15
култни парчиња извадени од архивите што го отсликуваат
славното минато на брендот преку својот дизајн, форма
и материјали, колекцијата вклучува осум унисекс маички
кои ја одбележале секоја деценија од постоењето, три
фустани, пар чевли и три чанти. Инспирирани од минатото,
а внимателни кон иднината, не само на брендот, туку и на
животинските видови, славејќи го јубилејот, од „Лакост“
годинава уште еднаш ги потврдија идеалите на нивниот
основач ветувајќи уште долги децении на едноставна
елеганција и крокодилска истрајност на стилот.