Portret Magazine No 33

Ч А С О В И З А П И Е Њ Е В И Н О
СМЕДЕРЕВКА
Традиционално бело вино со освежителна арома
И покрај мислењето дека смедеревката е вино со многу ниски квалитетни својства, првенствено поради
ниската продажна цена, сепак, оваа сорта е една од најраспространетите и најкористените во Македонија.
Околу смедеревката и нејзините карактеристики поразговаравме со м-р Петар Петров, асистент на МИТ
Универзитет- Скопје, Факултет за менаџмент на еколошки ресурси, катедра за безбедност на храна.
Смедеревката претставува една од најпродуктивните сорти за производство на бели вина
во нашиот регион. Според голем број автори, нејзиното потекло е од Смедерево, Србија, а
распространета е речиси низ целиот Балкански Полуостров. Во Македонија првпат е воведена во
1925 година и оттогаш до раните деведесетти години претставува една од најраспространетите
сорти за производство на бели вина. Застапена е во сите македонски виногорја. Нејзината
голема застапеност по лозовите парцели се должи на високата родност, која најчесто изнесува
од 16 до 25 тони на хектар, и добриот рандман на гроздот. Во просек околу 98 проценти од
масата на гроздот им припаѓаат на зрната. Зрната се одликуваат со златно-жолта боја и многу
богат вкус, поради што често пати смедеревката знае на пазарот да се сретне и како десертно
грозје.
Кога станува збор за вината добиени од смедеревка, секогаш се мисли дека тоа се бели вина
со многу ниски квалитетни својства, а ова е резултат на релативно ниската продажна цена
и несоодветно применетата техника за преработка на ова грозје, со цел да се добијат што
поголеми количини на вино. Но, всушност, не постои трпеза и некоја прослава кај нас без
присуство на смедеревката. И покрај лошите шпекулации, ова бело вино се одликува со доста
богато буке, освежителна арома на цитрусно овошје и зелено јаболко, а во потоплите региони
вината добиваат арома на мед. Грозјето синтетизира околу 20 до 22 проценти на шеќери, кои
при ферментативните процеси се конвертираат во алкохол кој најчесто изнесува 10 до 12
проценти. Смедеревката е вино што се одликува и со релативно висока содржина на вкупни
киселини кои во просек изнесуваат од 6 до 8 проценти.
Токму нежните ароми и релативно високата содржина на вкупни киселини ѝ даваат можност
на смедеревката да биде доминантна сорта во купажирањето со силно ароматизираните и
благи бели вина, при што се добиваат високо квалитетни полусуви до суви бели вина. Виното
смедеревка се одликува со жолта боја проткаена со зелени тонови. Квалитетните вина се
пакуваат во темнозелени шишиња со волумен од 750 милилитри. Ова освежително бело
вино се консумира како младо вино, без дополнително дозревање, а на трпезата се сервира
на температура од 10 до 12 Целзиусови степени. Лесните ароми и освежителниот вкус му
овозможува комбинирање со повеќе видови храна, а за најкомпатибилни се сметаат разните
зеленчукови салати, зеленчук на скара, пилешко месо, речни риби, како и свежи овошни салати.
64