Portret Magazine No9

Мозаик
РАСПОЛОЖЕНИ
ЗА ДОБРА КНИГА
„СКОКОТЛИВИ ПРИКАЗНИ“ – ОНОРЕ ДЕ БАЛЗАК [ЃУРЃА]
Низ единаесет живописни приказни, напишани лесно, течно и духовито, го гледаме
животот во Франција во првата половина на деветнаесеттиот век. Секој расказ е
целина за себе и носи одредена поука. Со оглед на тоа што основните теми се љубов,
сексуалност и односите помеѓу мажите и жените, оваа збирка е занимлива за секого,
без оглед на годините и на искуството.
„БЛУЗ ОД МЕШАНА КРВ“ – ЕСИ ЕДУЏИН [АНТОЛОГ]
Младиот, генијален трубач Херонимус е уапсен во еден џез-клуб. Оттогаш на оваа музичка
ѕвезда ѝ се губи трагата. Имал само дваесет години. Бил германски државјанин. И црнец.
Педесет години подоцна, Сидни Грифитс, сведок на овој настан, одбива да говори за тоа што
го видел. Но, кога на гости ќе му дојде Чип Џонс, пријател и колега од некогашниот бенд, со
приказна дека открил чудно писмо, за Сид почнува патот до искупувањето.
Од зачадените клубови на Берлин и на Париз од пред Втората светска војна до модерен
Балтимор, Сид го води читателот во фасцинантен, недоволно познат свет, во срцето на својата
совест. „Блуз од мешана крв“ е возбудлива и трогателна приказна за расните разлики, музиката,
љубовта и за предаденоста што ја бараме од себе и од другите во име на уметноста.
„СУДЕЊЕ“ – ЏЕЈМС ПАТЕРСОН [ТРИ]
Раскажана со бестрашниот глас на детективот Алекс Крос, „Судење“ е трогателна приказна за
човечкото зло, за љубовта и, пред сè, за храброста. Алекс од својата баба ја слуша приказната
за дедо му и за неговата борба за преживување во времето на Кју клукс кланот. Сега тој им ја
пренесува семејната приказна на своите деца - со романот што го пишува.
Како адвокат во Вашингтон на почетокот на XX век, Бен Корбет ги застапува најтешките случаи
во борбата против расизмот. Претседателот Рузвелт го замолува да се врати во родниот град за
да го истражи реформирањето на Кју клукс кланот, па тој не може да го одбие. Кога пристигнува
во Еудора, Мисисипи, го наоѓа мудриот Абрахам Крос и неговата прекрасна внука Муди, кои го
запознаваат со скриената страна на идиличниот јужначки град. Линчувањата се вообичаени,
а жителите во црниот кварт на градот живеат во постојан страв. Бен има цел да го прекине
владеењето на ужасот - но вистината што се крие зад сето тоа би можела скапо да го чини.
„ИСПОВЕДИ“ – КОЛИН ХУВЕР [АРС ЛИБРИС]
Роман за ризикување сѐ заради љубов – и за пронаоѓање на своето срце некаде помеѓу
вистината и лагите. На дваесет и една година, Обурн Рид веќе изгубила сѐ што ѝ е важно.
Во својата борба одново да си го изгради урнатиот свет, таа си ги зацртува целите и нема
простор за грешки. Но, кога влегува во едно уметничко ателје во Далас, барајќи работа, таа
не очекува да се појави длабока привлечност кон таинствениот уметник кој работи таму,
Овен Гентри.
Обурн ризикува првпат и си го препушта срцето да ја води, само за да открие дека Овен чува
голема тајна да не излезе на виделина. Неговото минато се заканува да го уништи сето она
што ѝ е важно на Обурн и единствениот начин таа да си го врати животот е да го отфрли
Овен од себе. За да ја спаси нивната врска, сѐ што треба да направи Овен е да се исповеда.
Но, во овој случај, исповедта може да биде многу подеструктивна од самиот грев.
108
Не запирајте со читањето тука: испратете ни е-пошта со вашите
податоци на contact@portretmag.com и освојте една од книгите погоре.