Portret Magazine No9

Фотографии од мебел: Ани и Дими
ЕМА НИКОЛОВА, ДИПЛОМИРАН ИНЖЕНЕР-АРХИТЕКТ, ДИЗАЈНЕР
ИНСПИРАЦИЈАТА СЕ КРИЕ И ЗАД
ЗРАК СВЕТЛИНА
Заради природата на работата, моето секојдневие е
исполнето со креативност. Низ оваа дејност е потребна
постојана отвореност за новините што се случуваат во светот
на архитектурата и дизајнот, но понекогаш и нурнување во
себеси. На некој начин, баланс помеѓу внатре и надвор.
Работата ја доживувам како алатка за личен напредок и
постојано усовршување, искуство, добри решенија, новини,
функционалност и добар дизајн.
Инспирација може да се најде насекаде, кога умот е насочен
во таа насока. Најчесто спонтана, таа знае да се крие зад
зрак светлина. Ја наоѓам во елеганцијата на формата,
минималноста во потегот, леснотијата што не го оптоварува
просторот, а додава нова визуелна компонента, обогатувајќи
со својата функционалност. Ме инспирира секој нов проект
во кој наоѓам предизвик да го извлечам најдоброто од
просторот.
Мојата прва самостојна колекција на мебел „{trikoN}“ е
дел од личното трагање за совршенство. Инспирација за
формата на овој проект беше стариот дрвен триножец,
а процесот – потрага по нова современа форма што има
употребна вредност. Дизајнирана е во духот на геометријата
и симетријата како основни начела на убавината,
изработена од дрво и боен метал, a елементите замислени
како функционални скулптури што би го облагородиле
домот. „{trikoN}“ носи новина во третманот на материјалот
и формата, како и користењето на современи наративни
средства. Нејзините поединечни елементи се едноставни,
а нивната комбинација прави сложена геометриска форма.
Оваа колекција беше наградена од организацијата „Young
Balkan Designers“ за време на фестивалот „Миксер“ годинава
во Белград, помеѓу 69 проекти од Балканот, одбрани од
136 апликации. Во моментов е на патувачката изложба низ
водечките фестивали за дизајн во регионот.
11