Portret Magazine No9

Галерија
Ирис Апфел – Ретката модна птица
Оваа 94-годишна модна икона не престанува да го воодушевува
модниот свет со своите несекојдневни ексцентрични модни
комбинации, но и со својата позитивна енергија и виталност.
Таа и нејзиниот сопруг Карл Апфел повеќе од 50 години се
творци на успешна бизнис-приказна, како сопственици на
една од најуспешните компании за текстил во Америка. Таа
за својот моден стил вели дека применува една едноставна
формула, не следи трендови, туку традиција, и дека низ
годините тој само се надградувал, но основата му е иста:
„Никогаш не давам повеќе од 700 долари за чанта и од 25
долари за фармерки од едноставна причина што не вредат
повеќе“, вели оваа „fashion granny“, чијшто заштитен знак
се големите очила во различни бои. Нејзин став е дека
сите ограничувања во модата произлегуваат од женската
несигурност: „Секоја жена што не поседува природна убавина
треба да знае како да се истакне и во секоја пригода да
изгледа атрактивно. Стилот не се купува со пари, тоа е нешто
што го поседуваш или не и се однесуваш инстинктивно. Јас сум
голем противник на пластични операции и вештачки помагала
за убавина. Јас наоѓам убавина во секоја фаза од животот и
сметам дека стареењето не е за страшливци“.
Вивиен Вествуд – Панкерката со огнена коса
Вивиен Вествуд, најексцентричната дама на британската
модна сцена, е една од најзаслужните за создавање на панкмодата
во седумдесеттите години. Таа со својата најголема
љубов и креативен партнер Малколм Мекларен создаваат
револуционерни колекции инспирирани од моторџии,
проститутки и различни фетиши, што веднаш паѓаат во очи на
модните фанатици. Кога Малколм станува менаџер на светски
познатиот бенд „Секс пистолс“, тие почнуваат да ги носат
нивните модели на настапи и турнеи и нивниот труд набргу
станува познат низ цела Британија и пошироко. Сите нејзини
колекции ја испраќаат истата порака, дека таа е оригинална и
ексцентрична модна икона, револуционерка, што не се плаши
да ризикува и да диктира модни трендови.
„Модата во секој облик има иста цел, а тоа е да ја прави
секоја жена прекрасна. Таа треба да се користи како оружје,
во изразувањето на личниот печат и на сопствениот став.
Нашата професија носи голема одговорност, но и уживање
дека испраќаме порака за подобар свет. Еве, моментално
е неопходно да го актуализираме прашањето за спас на
светските шуми“, вели Вивиен, жената со огнена коса, чиишто
ревии постојано испраќаат некој политички или општествено
одговорен став.