Create successful ePaper yourself
Turn your PDF publications into a flip-book with our unique Google optimized e-Paper software.
Јин-Јанг<br />
АНА БУНТЕСКА - ПОЕТЕСА<br />
ТАГАТА Е НАЧИН ЗА<br />
ВРАЌАЊЕ КОН СЕБЕ<br />
Општеството е гнило кога луѓето<br />
немаат избор да го живеат она што го<br />
заслужуваат и сакаат<br />
АЈ: На поезијата не ѝ можеме ништо! Што ја прави вашата<br />
поезија популарна во време на лајкови и брзи инстантвредности?<br />
АБ: Искреноста што вреска од секој збор зад кој стојам!<br />
АЈ: Има ли живот надвор од полисот?<br />
АБ: За човек кој знае како да живее, има живот секаде. Дишењето<br />
со полни гради и спокојот се основа за сè.<br />
АЈ: Што најмногу ве вознемирува кај себе?<br />
АБ: Чувствата. Избегнувам да читам што сум напишала, оти ми се<br />
има случено да останам вџашена од себе... од каде тие чувства?<br />
Од каде таа тага? Од каде знам нешта за кои сум сигурна дека<br />
барем во овој живот не сум ги минала? Таму немам контрола и<br />
затоа имам страв... или, како што напати знам да напишам, „без<br />
усул“ сум.<br />
АЈ: Свесноста за тагата ја прави тагата убава. Зошто?<br />
АБ: Исто како и среќата, така и тагата му е потребна на човек. Таа<br />
е начин за враќање кон себе, нурнување во сопствениот живот.<br />
Тагата прави чуда во уметноста и ги покренува механизмите во<br />
човек да се случуваат промени.<br />
АЈ: На кои полиња во општеството сте активни?<br />
АБ: Секаде каде што сум повикана или онаму каде што мојата<br />
совест и свест инсистираат да бидам. Секаде сум присутна<br />
доколку е тоа во согласност со моите етички и морални начела.<br />
АЈ: Во Скопје ме нервира...<br />
АБ: Отсуството на мирисот на градот што го љубев како дел од<br />
мене. Сега ми мириса на застоено, на лошотилак, ми мириса<br />
на несреќни луѓе и неубав вриеж. Некогаш се чувствувам како<br />
да снемувам воздух, притисната од бетон и некое константно<br />
сивило, за кое уште се надевам дека ќе го снема ако провее ветар,<br />
доволно силен за да му даде живот на Скопје. Баш пред извесно<br />
време имав напишано песна за градов што како веќе да не е мој.<br />
АЈ: Добрите луѓе ги препознавам по...<br />
АБ: По пенџерињата на лицето. :) Чудесна работа се очите, ако<br />
знаеш да видиш, сами ќе ти кажат сè за човекот. Добрите или,<br />
како што милувам да ги наречам – убавите луѓе, имаат посебен<br />
поглед и сјај, чистота во погледот.<br />
АЈ: Општеството е гнило кога...<br />
АБ: Општеството е гнило кога народот е несреќен! Кога повеќе се<br />
занимаваме со политика и немаштија, отколку со нешта што ни ги<br />
полнат душите со убости. Кога имаме одлив на умни и млади деца.<br />
Општеството е гнило кога луѓето немаат избор да го живеат она<br />
што го заслужуваат и сакаат.<br />
АЈ: „Кога пишувачот ќе си го растрепери сопственото срце,<br />
ќе може да ги растрепери и срцата на другите. Без лага, без<br />
китење“. Кои болки во животот не ги скривте од очите на<br />
јавноста?<br />
АБ: Сакам да се подбивам со смртта оти ѝ се плашам. Страв ми<br />
е оти ќе ми се поболи телото од преголема емотивност, дека<br />
најголема радост и болка е ќерка ми (оти за дете најмногу боли),<br />
дека успеав да преживеам љубов што се случува еднаш во<br />
животот. Јас болките не ги кријам, немам потреба од тоа. Таква<br />
сум, таа сум... една од многуте со свои паранои и неостварена<br />
љубов, тага и моменти на нескриена среќа. Не глумам, немам<br />
време за тоа, ниту, пак, волја.<br />
АЈ: На политичкиот кантар најмногу тежат лагите за...<br />
АБ: Старите велат... испружи ги нозете онолку колку што ти е<br />
долга чергата. Не ветувај она што не можеш да го исполниш,<br />
особено не на сиромашен и напатен народ. Нечиј глас можеби се<br />
купува со лаги, ама цената е душата и здравјето на човекот.<br />
АЈ: Споменик би му изградилa на...<br />
АБ: Нема веќе место за споменици во градов. Не сум по<br />
спомениците, повеќе би изградила детски парк, со многу<br />
зеленило и смеа внатре.<br />
АЈ: Најсоголена се чувствувам кога...<br />
АБ: Кога пишувам или кога одговарам на вака умесно поставени<br />
прашања. :)<br />
АЈ: За секое грнче, има капаче. :) Кое е вашето капаче?<br />
АБ: Уште си го бара грнчето. :)<br />
АЈ: Омилена филмска реплика ми е...<br />
АБ: “You cannot find peace by avoiding life, Leonard”- Вирџинија<br />
Вулф, „Часови“<br />
АЈ: Август е месец на/за...<br />
АБ: Смеа, радост, тага, немир, борба, страст, љубов – ЖИВОТ. Да<br />
ставиме лајк на својот живот, каков и да е... оти друг немаме!<br />
Фотографија: Жарко Чулиќ<br />
125