Strategjia e Zhvillimit të Qëndrueshëm të Komunës ... - UNDP Kosovo

Kapitulli i Gjashtë
QEVERISJA E MIRË
“Qeverisja e mirë” është një Objektiv shtesë Zhvillimor i Mijëvjeçarit, i përzgjedhur
posaçërisht për Komunën e Gjakovës, duke qenë se përmirësimi i qeverisjes në
nivel lokal konsiderohet si një faktor kyç për të garantuar zhvillimin ekonomik e
shoqëror të komunës. Thelbi i punës për qeverisjen e mirë është kuptimi nga të gjithë
se përmirësimi i qeverisjes është një proces i dyanshëm. Nga njëra anë ai kërkon forcimin
e kapaciteteve të strukturave të pushtetit lokal për të hartuar e zbatuar me sukses
politikat e zhvillimit ekonomik e shoqëror të komunës dhe për të marrë përsipër
përgjegjësi të reja në kuadrin e reformës së decentralizimit të pushtetit. Nga ana tjetër,
duhet kuptar se nuk mund të ketë qeverisje të mirë pa pjesmarrjen e qytetarëve në qeverisje,
gjë që kërkon ndërgjegjësimin e publikut për rolin dhe përgjegjësitë e tij në qeverisjen
e komunës, institucionalizimin e pjesëmarrjes së publikut në vendimmarrje
dhe forcimin e rolit të organizatave të shoqërisë civile në këtë proces pjesëmarrjeje.
6.1 Struktura dhe përgjegjësitë e qeverisjes lokale
Forma e qeverisjes lokale në Kosovë është Komuna. Komuna rregullon dhe udhëheq
çështjet publike brenda territorit të saj për të siguruar kushte për jetë normale
dhe të qetë për të gjithë banorët. Ajo kujdeset, gjithashtu, për çështje me
interes të përgjithshëm që ndërlidhen me komunën dhe nuk mund të shqyrtohen
vetëm nga pushteti qendror apo ndonjë organ tjetër. Territori i Komunës është i
përbërë nga disa fshatra. Komuna e Gjakovës ka në përbërje të saj 31 fshatra.
Kuvendi i Komunës është organi më i lartë përfaqësues i komunës (shih Figurën
6.1), i cili zgjidhet në mënyrë të drejtpërdrejtë. Në Komunën e Gjakovës
Kuvendi ka sot 41 delegatë, që përfaqësojnë parti të ndryshme politike. LDK dhe
AAK kanë aty numrin më të madh të vendeve, përkatësisht 41.47% dhe 24.39%
(shih Figurën 6.2). Kuvendi i Komunës emëron Komitetin për Politikë e Financa,
Komitetin e Komuniteteve dhe Komitetin për Ndërmjetësim me anëtarë të Kuvendit.
Këto Komitete mund të kooptojnë edhe anëtarë jashtë Kuvendit, por këta
nuk mund të përbëjnë kurrsesi shumicën dërrmuese të Komiteteve.
Veprimtaria e pushtetit lokal drejtohet nga Kryetari i Komunës dhe nga dy
Nënkryetarë, të cilët zgjidhen nga Kuvendi i Komunës nga përbërja e këshilltarëve
të tij. Kjo veprimtari realizohet përmes administratës së komunës, e cila
drejtohet nga Kryeshefi Ekzekutiv dhe Bordi i Drejtorëve. Në Bordin e Drejtorëve
bëjnë pjesë drejtorët e 13 Drejtorive, të cilat formojnë strukturën organizative të
administratës së komunës.
STRATEGJIA E ZHVILLIMIT TË QËNDRUESHËM TË KOMUNËS SË GJAKOVËS
83
6
QEVERISJA E MIRË