DEKAT DIGITAL 2019 - 2020

KANSVATTER:
DIE RUSTELOSE
LEWE VAN
GENERAAL
BEN VILJOEN
In dié uittreksel uit CAREL VAN DER MERWE
se nuwe boek verduidelik hy hoe hy die
spoor van generaal Ben Viljoen volg en
watter bronne hy opgespoor het om die
legkaart saam te stel van dié komplekse
man wat die wêreld platgetrap het en ’n
kleurryke en avontuurlike lewe gelei het.
April 2017
Ek daag vroegaand op by die plaas aan die voet van
die Drakensberg naby Elliot in die Oos-Kaap waar ek ’n
rondawel vir ’n paar dae bespreek het. Ek is op soek na
die grot waar Ben Viljoen volgens hom in 1868 gebore
is. In antwoord op my vraag of daar ’n groot grot in die
omgewing is, vertel die vriendelike gasvrou my van Valie
se grot hoog op teen die berg, ’n paar uur se klim. Sy ken
egter ’n boer wat my met sy bakkie met ’n agterpad tot
redelik naby kan neem. Die volgende oggend bel ek Braam
Botha en die middag ry ons bergop met ’n klipperige
grondpad wat naderhand in die veld op ’n plato eindig.
Maar Braam beur voort met sy bakkie deur die lang gras.
Uiteindelik kom hy tot stilstand naby die rand van die plato
en ons klim uit. Voor my uitgestrek is ’n manjifieke toneel:
hoë bergpieke met imposante sandsteenformasies, groen
berghange en diep valleie, verder weg die bewerkte
landskap van die Elliot-omgewing, op die suidelike horison
ander berge. Hier voel ’n mens klein.
113