DEKAT DIGITAL 2019 - 2020

Kamers
van koophandel
Twee Stellenbosse vroue se idee om handwerk in ’n huis te
verkoop was so gewild dat dit gegroei het tot ’n nasionale
mark waar eg Suid-Afrikaanse produkte van entrepreneurs
van oor die hele land verkoop word. THEO KEMP het met van
hulle, wat van vonkelwyn tot strikdassies maak, gaan gesels.
Sewentien jaar gelede in die ruim kamers van ’n huis in die lowergroen Stellenbosch is Kamersvol
Geskenke gebore. Dit was nooit die idee om ’n nasionale toonaangewende mark met die nuutste
ontwerpe en eg Suid-Afrikaanse produkte te begin nie. Dit het alles toevallig gebeur toe twee
vroue met ’n oog vir mooi, die domineevrou Amelia van Zyl en haar vriendin, Lize-Marie van der
Westhuizen, ’n paar mooimakers bymekaar gehark het en gevra het om hul handewerke te bring
en in die huis te verkoop. Dit was so gewild dat die vroue nie anders kon as om dit die volgende
jaar te herhaal nie. En soos die cliché lui: die res is geskiedenis. Maar al het Kamersvol Geskenke
intussen vele metamorfoses ondergaan – wat vandag bekend staan as KAMERS/Makers – slaan
die gene vandag nog sterk deur in al die nasionale opskietmarkte in nie net Stellenbosch nie, maar
Kaapstad, Pretoria en Johannesburg. Dié mooiste trekke is dat alle produkte steeds handgemaak is,
deur vakmanne en -vroue wat hulle staal wys, en dat alles wat te koop aangebied word, op eie bodem geskep is.
Trots Suid-Afrikaans. Trots tuisgemaak. Dit is die twee pilare waarop KAMERS se sukses staangemaak is.
As getroue ondersteuner van KAMERS/Makers wat met groot genot hierdie inisiatief sien groei het van 40 verskaffers
tot vandag se 200 per mark, moet ek my belange as bevoordeelde skrywer reeds vroeg in die artikel verklaar. Maar
as ek nie myself toelaat om die saak te besing nie, sal die statistiek die noot hoog insit: reeds 45 markte is aangebied
sedert 2003; 800 mense is na die eerste mark getrek – wat indrukwekkend vir ’n gewone huis is – tot vandag se
ongeveer 60 000 voete per jaar; twee vroue se droom het gelei tot ’n gedugte span van tien vaste personeellede.
’n Groot deel van die sukses van KAMERS/Makers is dat elke mark met skerp oë aanmekaar geslaan word. Sonder
om elitisties te wees, is dit die werk van Wanda du Toit, die hoofeienaar en kreatiewe direkteur, en haar medewerkers,
om seker te maak dat elke verskaffer met die hand uitgekies word. Die een hand was ook so die ander, want sonder
KAMERS/Makers is daar vir vele van die entrepreneurs nie ’n platform om hul produkte te verkoop nie, en sonder die
entrepreneurs wat hul nekke uitsteek om die markwaters te toets, is daar nie ’n KAMERS/Makers nie. ’n Resep wat
makliker klink as gedaan, want hoewel KAMERS/Makers die mark so goed soos die palms van hul hande ken, bly
kopers verras met wat hul voorkeure is. En dit verskil van die een mark na die ander.
194