DEKAT DIGITAL 2019 - 2020

Gourmet
plaaskos
Wanneer die sjef van Pierneef à La Motte Restaurant saans by
die huis kom, skuif hy weer agter die kospotte in, want hy is
passievol oor kosmaak. Dit is nie net sy beroep nie, maar ook
sy stokperdjie. Almal verwag dat die soort kos wat hy in die
restaurantkombuis maak, ook dit is wat hy tuis maak, vertel Eric
Bulpitt aan GERARD SCHOLTZ.
“Ek hou van hartlike, huislike kos. Geroosterde kaastoebroodjies of ’n spaghetti bolognese is nie ongewoon nie. Ek
hou van braai wanneer die weer goed is en ek is mal oor groente wat op die vuur berei word. Dan kry jy ’n diepte
van geur en tekstuur wat jy nie in ’n pan kry nie. Verder hou ek van ’n regte aïoli en warm souse. My yskas tuis het
altyd al die geurmiddels wat ek by byna elke dis voeg. En dan put ek baie inspirasie uit die Japanse kookkuns. ’n
Umamiryke aftreksel met noedels is elke week of twee op die tafel.”
Oorkant my onder die groen eikebome van die wynplaas, La Motte, sit Bulpitt.
Effense rooi skynsel in sy baard, potlood agter die oor, ’n vietse leervoorskoot
aan met hier en daar ’n vlek wat dit ’n heerlike patina gee, en
sy oë kyk kort-kort in die rigting van die oop kombuis waar sy assistente
besig is met voorbereidings vir die gesofistikeerde plaaskosetes waarvoor
Pierneef à La Motte so bekend is. Waar tradisie, erfenis en die omgewing
so ’n groot rol speel.
Bulpitt beklemtoon dat dit vir hom ’n voorreg is om by Pierneef à La Motte
te werk. “En dan ook die koskultuur hier. Om disse van my kindertyd op
’n nuwe en verbeeldingryke manier te verwerk onderstreep nostalgie. Die oorvloed van wat die plaas bied en ook
om met die plaaswerkers saam te werk laat my voel ek hoort hier. Dat hier ’n baie spesiale verbintenis tussen my
en die plaas is. Almal is passievol oor wat hulle doen en ook om met kreatiewe mense saam te werk is ’n inspirasie
om gedurigdeur in die erfenis van ons land te delf. Natuurlik help dit om uitstekende wyne hier te hê en om met die
keldermeester Edmund Terblanche saam te werk wanneer dit by kos- en wynpasmaats kom. ’n Verdere inspirasie.”
210