ZINDABA ZAKHO MNGOMA: INGONYULUKA ... - UZSpace Home

ngendlela ebhanyiswa ngayo Ie mimoya uma isimngenile umuntu. Kucwaningwe
nangemithi yamagobongo obulawu nangendlela ethakwa ngabo.
Kukulo lolu cwaningo lapho kutholakale nokuthi ngisho isangoma esidala
esangenwa umoya wabaphansi siyaphinda singenwe idlozi labalozi, idlozi
elinamandla, umoya ozikhulumela wona ngokwawo uma kunamafindo adinga
ukuqaqwa. Ucwaningo luthole ukuthi amanye amafindo awemindeni kanti
amanye awesizwe sonkana. Yizo lezi zangoma omangothobana abayithemba
lesizwe uma izinto zonakele.
Le mimoya futhi iyahlonishwa kodwa ayingeni wonke umuntu. Imimoya engena
umuntu ngokuzalana kulowo mndeni owawunesangoma kuphinde kuvele esinye.
Lolu cwaningo luveza ukuthi uma lowo ongenwe yidlozi enzelwe yonke imicimbi
efaneleyo, idlozi liyakhanya, imihlahlo yakhe icace. Ucwaningo luveza ubufakazi
bokuthi uma ithwasa liliphathe kahle ithongo lalo nalo ithongo liliphatha kahle
ithwasa.
Kukulo lolu cwaningo lapho kuvele khona ukuthi isangoma asidli konke ukudla
kodwa siyakukhetha ngoba okunye kokudla okudliwa ngabantu nje kungukufa
esangomeni. Ucwaningo luthole ukuthi isangoma nethwasa asiyidli ingulube
ngoba ayizwani nedlozi. Uma isangoma sithinte ingulube, sidinga ukuba sigeze
ngobulawu, sisuse lawo mashwa. Izangoma namathwasa awayidli inhlanzi ngoba
ibushelelezi idlozi liyoshelela. Lolu cwaningo luveze nokuthi ithwasa
elingakaphothulwa alivunyelwe ukuya elawini, idlozi liyaphupha, lingaphumeleli
ekubhuleni kwalo.
Kulolu cwaningo kuvele nokuthi uma kubulawa imbuzi noma inkomo eqondene
nemisebenzi yesangoma, kunakwa kakhulu igazi, inyongo, isinye nesikhumba.
Ucwaningo luthole ukuthi imimoya yabangasekho ihlala egazini lesangoma,
amadlozi adla kuye futhi aphuza kuye, ngokunjalo ahhema kuye. Uma kubulawa
isilwane, kugcizelelwa ukuba ithwasa liliphuze igazi lesilwane lisashisa ngoba
125