2011-2015

G L
2013
Nese momento precipítome ao baleiro. Caio a unha velocidade
asombrosa. Maldigo a Newton novamente. Imaxino os meus miolos
esparexidos por algunha rúa. Atópome a 500 metros do chan. 400. 200.
100. 50. 10. 5. 1…
Esperto.
Abro os ollos preguizosamente. Son as sete da mañá. Na mesa de
cabeceira atópase El Gen Egoísta de Richard Dawkins. O portátil aínda
está acendido, o vídeo de Neil Tyson falando sobre os buracos negros xa
descargou. Este home é xenial. Vístome e saio da casa. Diríxome a unha
cafetería do centro.
–Café só, por favor.
Abro o xornal:
«O Goberno recorta 600 millóns de euros en I+D+i».
Políticos… concédenlles aos bancos miles de millóns de euros para
logo recortar en ciencia; aínda que non logro explicarme como unha
institución como Bankia puido crebar estando nas mans de tal selecto
grupo de xenios (non se viran tantos premios Nobel xuntos dende a
Conferencia de Solvay do 27).
Paso a páxina.
«Non se lles pagarán os premios aos ganadores das Olimpíadas de
Física debido á falta de orzamento».
Canta razón! Nerd, frikis, só sabedes masturbarvos, que facedes
estudando física aos 17 anos? Dedicádevos ao fútbol!
Pago o café, recollo a mochila e diríxome á Facultade.
120