Luxembourg - Entreprises magazine

Carte blanche
« C’est avec du vieux qu'on fait
du neuf... »
(1) (2)
D’Joer as grad 9 Deeg al an et huet scho méi Froen ewéi Deeg. D’Cargolux, BIL, KBL, ArcelorMital,
Luxair, Lëtzebuerg an Europa, den Euro, Staatsfinanzen an d'Vertrauen an eis Institutiounen. Mir dinn
eis schwéier ze erkennen, dass dat, wat am gaang ass an Europa an zu Lëtzebuerg, keng normal Kris
ass. Et ass een Paradigmewiessel. De Räichtum gëtt an Zukunft net mäi geschafen an Europa mä a
China, Indien an a Russland.
Dat neit Joer 2013 fänkt mat deenen
Erausfuerderungen un, mat deenen
dat aalt opgehalen huet. D’Welt ass,
net nom Kalenner vun de Mayaen,
den 21. Dezember ënnergaangen,
ewéi der vill et gemengt haten.
Neen, 2013 wäert weider
grouss Erausfuerderungen un eis
all stellen.
Déi gréisst Erausfuerderung
wäert awer sinn ewéi Lëtzebuerg
an dënnen nächsten Jorzéngte
sech wäert opstellen. Déi rasant
Entwécklung vun der neier Welt,
China, Indien bréngt et mat sech
dat mer, op mer wëllen oder net, eis
an dem neie globaliséierte Kontext
mussen nei opstellen. Dës Erausfuerderung
gëllt fir all Länner aus
der sougenanntener aler Welt.
Mir stinn net eleng do
Et geet hei och net drëms an de
Pessimismus ze falen, mä fir virun
eis ze kucken an zesummen eist
Land fir d'Zukunft nei opzestellen
an engem sougenannten « Luxembourg’s
next Business Model ».
Mir hu vill Plus-Punkte fir
déi mir am Ausland bennide ginn;
eis Liewensqualitéit, eis Sozialleeschtunge
fir der nëmmen e puer
ze nennen. Dat solle mer wëssen,
mä et soll eis och net fesselen.
Éischte Punkt vun dësem
Modell misst sinn den Inventaire
ze maache vun eise Méiglechkeeten
a vun eise Ressourcen.
Mir hu Kär-Kompetenzen op déi
mer kënnen opbauen. Kompetenz
vun engem Industrie Standuert,
Kompetenz vun enger Bankeplaz
a Kompetenz vun enger europäescher
Haaptstad.
Doriwwer eraus ass zu Lëtzebuerg
ëmmer eng spezifesch
kulturell Kompetenz gewiescht,
Mediatioun Interkulturell tëscht
deenen zwou grousse kontinental
europäesche Kulturen, där däitscher
an där franséischer.
Op dës Avantagen, « Le
vieux » kënnen mer opbauen, neies
dorausser ofleeden. Mir kéinten
zum Beispill eis portugisesch Kultur
déi och hei am Land doheem ass,
zesumme mat der Kompetenz vun
der Finanzplaz fir zum Beispill fir de
lusophonne Maart a Südamerika an
an der Welt weiderentwéckelen. Mir
hätten deemno eng Kär Kompetenz,
Bankeplaz mat enger spezifescher
Kompetenz Mediatioun Culturelle,
kombinéiert an domat eng nei
Aktivitéit entwéckelt.
« C’est avec du vieux qu’on
fait du neuf »
Vernetzung vu Kär- a Spezifeschen-
Kompetenzen eleng geet awer net
duer fir de Kader vun dem neie
Modell ze setzen.
Mir mussen eis och zeréck
besënnen op dat wat eis zu Lëtzebuerg
ëmmer staark gemaach
huet. Eis Buedemstännegkeet an
eise Pragmatismus. Mir si kee Land
vu groussen Ideologie mä e Land
vum Raisonnabelen. Mir hunn eis
sozial Konflikter net op der Strooss
ausgedroe mä à la « luxembourgeoise
» dat heescht mat gesondem
Mënscheverstand. Dofir musse
mer eis an dem Kontext zwou Froe
stellen a beäntwere fir eisen Dialog
sozial nees un d'Dréien ze kréien.
Éischtens, wei gesi mer an Zukunft
Gläichgewiicht tëschent deem
deen all Dag op seng Aarbecht fiert,
den schaffende Leit engersäits, an
anersäits, deem deen e betriblecht
Risiko, an enger globaliséiert Welt
dréit, dem Entrepreneur? Musse
mir net eise Contrat sozial neien
Erausfuerderungen upassen?
Zweetens, ass déi klassesch
Tripartite aus de 70 Joere representativ
genuch fir eis Äntwerten op
dës Froen aus dem 21. Jorhonnert
ze ginn? Missten do net nach aner
Persoune Gruppe mat um Dësch,
ewéi ONGen, Société civile mä awer
och Investisseuren?
Ouni alles futti ze schloen,
mä mat präzisen iwwerluechten an
duerch-diskutéierten Upassunge
kéinte mer och an dësem Feld no
dem Refrain vum Lidd La dame
patronnesse vum Jaques Brel virgoen:
« C’est avec du vieux qu’on
fait du neuf ».
Wann mer d’Äntwerten op
dës zwou Froen hunn da kënne
mer och eng Zukunft-Visioun fir
Lëtzebuerg entwéckelen. Am Kader
vun dëser Zukunft-Visioun musse
mer awer och de Realitéite vum
21. Jorhonnert Rechnung droen.
War an de 70 Joeren d'Stad
Lëtzebuerg, d'Haaptduerf aus dem
Land, esou ass dës Stad elo eng vun
de weltwäit wichtegste Finanzplazen
an eng europäesch Haaptstad
eng Kär-Kompetenz ginn. Esou
eng Stad muss mat agebonne gi
proportional zu hirer Kraaft, hiren
auslännesche Matbierger, bei der
Entwécklung vun der Visioun vu
Lëtzebuerg. D’Stad huet eng eege
Responsabilitéit z'iwwerhuelen.
Generell muss an där Visioun,
d'Relatioun Staat a Gemenge mat
de Stied iwwerduecht ginn. Mir
brauche Verwaltungsstrukturen déi
dem 21. Joerhonnert entspriechen.
Hei kënne mer mat zwee Fangeren
an der Nues deen een oder
anere Prozent Wuesstem sécher
erauskëddelen.
Hei gëllt méi ewéi sécherlech
och den Refrain : « C’est avec du
vieux qu’on fait du neuf ».
Marc Hostert
President vun der Fondatioun
Fuse-Esprit d’Entreprise
an ass am Jury vun der Emissioun
Success Story
Follow Marc Hostert sur Facebook
et Twitter : @marchostert
(1) Carte blanche diffusée le 9/01/2013
sur RTL Luxembourg 95.5.
(2) Chanson La dame patronnesse de
Jacques Brel et reprise par Georges
Brassens.
© Yves Kortum
14