Os dados do reloxeiro

A r-evolución que está por vir 33
Humanos para sempre
Mais non todos os científicos e tecno-filósofos cren que a hibridación
home-máquina se vai conseguir en tan curto prazo, e algúns, como o
físico e matemático Roger Penrose, pensan que nunca se poderá emular
o sistema nervioso e a consciencia nunha máquina. A pregunta máis
importante segue a ser esta: é a consciencia simplemente o produto da
estrutura e función do sistema nervioso ou, pola contra, hai algo innato
á materia viva que é imposible de reproducir nunha máquina? Ninguén
o sabe. Incluso dentro do grupo dos que pensan que a chegada dos
cyborgs é só cousa de tempo, hai pensadores que non cren que sexa tan
“fácil” e inmediato. Jaron Lanier –científico computacional, creador do
termo “realidade virtual” e un dos seus precursores– é un dos grandes
críticos dos cyber-totalistas, a forma que ten de chamarlles a pensadores
como Kurzweill. Lanier cre que as máquinas conscientes e os cyborgs
aínda están moi lonxe de ser realidade. Pensa que un dos principais
problemas é a mala calidade do software actual, moi inestable e con
pouca plasticidade.
O planeta efémero
A tecnoloxía é un proceso evolutivo con crecemento exponencial, unha
continuación da evolución biolóxica. Non hai nada de malo nin de
artificial nisto, é tan natural como a choiva, tanto se nos gusta coma se
non. A vida leva facendo o mesmo desde hai uns 3500 millóns de anos.
A novidade é que somos a única especie que está a combinar o seu
acervo biolóxico coa súa propia evolución cultural e tecnolóxica. Mais,
por que alterar os nosos corpos en lugar de permanecer iguais? Marvin
Minsky –un dos pioneiros en intelixencia artificial, profesor do MIT–
cre que isto é así porque non temos outra alternativa. Se pensamos en
escalas cósmicas de tempo, a evolución a cyborgs será a única maneira
de non extinguirnos. Por moitas razóns, entre elas polo feito de que o
Sol destruirá o planeta Terra en menos de 5000 millóns de anos. Hai
que ir pensando nos chalecos salvavidas.