Os dados do reloxeiro

80 Os dados do reloxeiro
viduos viven tan só horas ou días, tempo suficiente para reproducirse;
mais, noutras a vida prolóngase por decenas, centenas ou incluso miles
de anos, como no caso dalgúns vexetais.
Na variedade está o gusto
O proceso de envellecemento non é simple, senón que actúa sobre o
organismo desde moitos ángulos; estamos rodeados! Na busca dunha
explicación o que se precisa son teorías, e hai varias. Probablemente
todas teñan algo de verdade: algunhas células morren debido á
activación de xenes do envellecemento, trátase dunha morte celular
programada; outras son vítimas do ataque dos radicais libres, perigosas
moléculas producidas no proceso de respiración celular; alén diso, ao
longo da vida vaise producindo un desgaste como consecuencia da
acumulación de erros na duplicación do ADN celular, na produción de
proteínas, etc., polo que o corpo vai perdendo eficacia.
As liñas de investigación actuais son tan variadas como as teorías
apuntadas e están a dar resultados espectaculares. Cada descubrimento
é rapidamente amplificado polos medios de comunicación, que nos
informan dos novos elixires para facer a estanza no planeta Terra un
pouco máis longa. Melatonina, dietas baixas en carbohidratos, un vaso
de viño tinto ao día,... funcionan? En animais microscópicos, si; nos
humanos probablemente tamén, mais hai que ter en conta que a
maquinaria da vida é marabillosamente complexa, igual que os
mecanismos asociados ao envellecemento, polo que non pode haber
substancias milagrosas.
Un vello elixir
O efecto beneficioso do viño tinto para alongar a vida só está, polo de
agora, demostrado nun organismo minúsculo, o fungo unicelular
Saccharomyces cerevisiae –ou fermento da cervexa, moi utilizado para a
investigación en bioloxía molecular–. Unha molécula presente no viño
(un polifenol) é capaz de incrementar a vida do fungo nun 70%, milagre
que se consegue activando uns determinados mecanismos encimáticos.
O que non sabemos é se funciona da mesma maneira na especie
humana. O optimismo dos científicos débese a que no noso organismo
temos encimas –un tipo de proteínas– moi parecidas ás do fungo. Na