Blómleg búseta og þróun þjónustu

2
um landið á síðustu árum og hafa áhuga á að skoða hvernig búseta í dreifbýli hefur áhrif á
óskir og þarfir íbúa.
Tilgangur rannsóknarinnar er að kanna viðhorf, óskir og þarfir aldraðra íbúa í
Eyjafjarðarsveit fyrir þjónustu og búsetuúrræði í sveitarfélaginu. Eftirfarandi
rannsóknarspurningar eru settar fram:
1. Hver eru viðhorf aldraðra íbúa í Eyjafjarðarsveit til félagsþjónustu og búsetuúrræða
í sveitarfélaginu?
2. Hvaða óskir og þarfir hafa aldraðir íbúar í Eyjafjarðarsveit fyrir félagsþjónustu og
búsetuúrræði í sveitarfélaginu?
Skoðuð er tómstundaiðja, ferliþjónusta, búsetuúrræði og heimaþjónusta íbúa og
hvernig þessi atriði ýta undir eða hamla þátttöku þeirra í daglegu lífi. Notast er við
megindlega rannsóknaraðferð. Gagna er aflað með símakönnun þar sem rannsakendur hringja
í alla íbúa 67 ára og eldri sem hafa lögheimili og búa í Eyjafjarðarsveit.
Til að stýra rannsókninni er stuðst við hugmyndafræði kanadíska iðjulíkansins (e.
Canadian Model of Occupational Performance (CMOP)). Í meginatriðum snýst
hugmyndafræðin um að efla þá iðju sem einstaklingurinn stundar í ákveðnu umhverfi.
Hugmyndafræðin skilgreinir færni sem innri upplifun einstaklingsins og byggir bæði á
frammistöðu og ánægju. Lögð er áhersla á styrkleika einstaklingsins og úrræði í umhverfinu
til að styðja við hann. Hugmyndafræðin skoðar hvernig samspil einstaklings, iðju og
umhverfis hefur áhrif á færni við iðju (Law, Polatajko, Babtiste og Townsend, 2002).
Þekkinguna sem hlýst af rannsókn þessari má mögulega nota til að fá betri sýn yfir
viðhorf, óskir og þarfir eldri íbúa í Eyjafjarðarsveit. Þekkingin gæti nýst til að bæta þá
þjónustu sem er til staðar og auka aðgengi allra að henni. Niðurstöðurnar gætu gagnast öðrum
sveitarfélögum til að byggja upp og auka þjónustu við aldraða.