Blómleg búseta og þróun þjónustu

16
sig nýjum verkefnum við starfslok vegna rýmri tíma. Í grein Olson og O'herron þar sem
skoðaðar voru og bornar saman ýmsar rannsóknir kom fram að þeir sem hafa stundað
tómstundaiðju í gegnum lífið eru í minni áhættu á að einangrast eftir að launaðri vinnu hefur
verið hætt (Olson og O'Herron, 2004). Vegna þessa er mikilvægt að vel sé hugað að
tómstundastarfi aldraðra og séð til þess að sá aldurshópur geti stundað þá iðju sem hann óskar
eftir. Löngum hefur verið fjallað um mikilvægi líkamlegrar virkni á heilsufar en í seinni tíð
hafa rök verið leidd fyrir því að félagsleg og andleg virkni sé jafn mikilvæg. Þessar rannsóknir
eru ekki óyggjandi en má nefna að þær benda til að þess að þátttaka í virkri tómstundaiðju
getur dregið úr líkum á elliglöpum og þunglyndi hjá öldruðum (Wang, Karp, Winblad og
Fratiglioni, 2002).
Nokkuð úrval er í boði af skipulagðri afþreygingu og tómstundaiðju í Eyjafjarðarsveit
sem höfða til eldri íbúa jafnt og annarra. Tvö félagsheimili eru í sveitinni. Félagsheimilið
Freyvangur þjónar að mestu hlutverki áhugamannaleikhúss en þar eru einnig haldnar veislur,
tónleikar, ættarmót og aðrir viðburðir. Laugarborg er staðsett í Hrafnagilshverfi og þjónar
hlutverki tónlistarhúss auk þess sem það er leigt undir aðra viðburði. Öflugt kórastarf er í
Eyjafjarðarsveit en tveir kórar eru þar starfandi, Kirkjukór Laugalandsprestakalls og Karlakór
Eyjafjarðar en þeim félagsskap fylgja ferðalög og tónleikar (Eyjafjarðarsveit, e.d.a).
Eins og áður hefur komið fram er starfrækt Félag aldraðra í Eyjafirði (Eyjafjarðarsveit,
e.d.a). Ekki eru til skriflegar upplýsingar um starfsemi félagsins en samkvæmt Hildi
Gísladóttur, formanni félagsins er ýmis starfsemi í boði. Má þar nefna ferðalög, leikfimi og
handavinnusýningar (Hildur Gísladóttir munnleg heimild, 18. apríl 2013).
Árið 2009 fékk félagið aðstöðu í húsnæði sem áður hýsti heimavist Hrafnagilsskóla
(Eyjafjarðarsveit, 2009). Húsnæðið sem í daglegu tali er kallað Félagsborg er opið alla
mánudaga yfir vetrartímann frá klukkan 13:00 – 17:00. Þar fer fram ýmis starfsemi t.a.m.
kaffisala, stólaleikfimi og handverk s.s. útskurður, prjón, hekl, bútasaumur, málun og glerlist.