Blómleg búseta og þróun þjónustu

44
KAFLI V
UMRÆÐUR
Í þessari rannsókn var leitast við að varpa ljósi á viðhorf, óskir og þarfir aldraðra íbúa í
Eyjafjarðarsveit fyrir þjónustu og búsetuúrræði í sveitarfélaginu. Í kaflanum eru helstu
niðurstöðum rannsóknarinnar gerð skil, túlkaðar og þær bornar saman við áðurnefnd
fræðaskrif og hugmyndafræðina sem stýrir rannsókninni. Fjallað er um efnið í sömu röð og
það kemur fyrir í niðurstöðukaflanum. Í lokin er komið inn á hugmyndir að frekari
rannsóknum í tengslum við viðfangsefnið, helstu takmarkanir rannsóknarinnar og hagnýtt
gildi hennar fyrir iðjuþjálfun.
Eins og áður hefur verið nefnt var tilgangur þessarar rannsóknar að fá sýn á viðhorf,
óskir og þarfir aldraðra til að þróa þjónustu sveitarfélagsins við þennan aldurshóp. Þessi
starfsaðferð er í anda hugmyndafræði valdeflingar en þar er lagt upp úr því að gefa notendum
færi á að finna leiðir til að bæta eigin stöðu (Farley o.fl., 2009). Með valdeflingu hafa
notendur aukið vald við skipulagningu þjónustu, umönnun og meðferð og geta þannig lagt sitt
af mörkum til þjónustunnar sem ákvarðast af persónulegri upplifun notenda. Slík þjónusta
getur tryggt betri skilvirkni svo starfsemin verði áhrifameiri og hæfi notendum betur (WHO,
2008).
Tómstundaiðja
Í niðurstöðum rannsóknarinnar kom fram að flestir þátttakendur stunduðu
tómstundaiðju nær daglega og voru vinsælustu viðfangsefnin handavinna og lestur.
Samkvæmt Olson og O'herron (2004) eru þeir sem stundað hafa tómstundaiðju í gegnum lífið
í minni áhættu á að einangrast eftir að launaðri vinnu hefur verið hætt. Mikilvægt er því að vel
sé hugað að tómstundastarfi aldraðra og séð til þess að sá aldurshópur geti stundað þá iðju
sem hann óskar eftir.