Juni 2023 / Borkum-Aktuell - Das Inselmagazin

Juni 2023
Ein Woord up platt
Stoppsatt
Ein Burinske in ein Dörp in Oostfreisland was
bekennt, dat seej allemachdeg knieperg was,
ein Gitzlappe. Dej Maiden, dej seej harr,
wassen noit lang in Deinsten bi hör,
umdat seej minn betahlde un uk dat Eten,
wat up Tavel kwamm, was man freewat schraa.
Ein Wicht, dat ein Settje bi hör warkt harr,
hett sück bi ein Schiedsmann beklagt.
Dat Eten was minnachdeg west,
seej harr alltied noch Smacht hatt, wenn seej van
de Tavel upstunn. Ein elendege Baul.
Dej Schiedsmann was dat neit recht,
wat heej hören de. Heej kunn dej Familie
un harr alltied docht, dat wassen fiene Lü.
Heej neugde dej Frou, doch bi hum intau kieken
un hett hör dann vertellt, wat dat Wicht seggt
harr.
„Wat“, see dej Frou, „mien Wichter waarden neit
satt? Ik will hör wat seggen: Dat gifft dreej Arten
van satt – satt, dick satt un stopp satt.
Mien Maiden waarden satt!“
Pannkauken
Harm muss verskeiden Saken offlevern,
bi ein Familie, bi dej heej gaud bekennt was.
De Heer van’t Huus neugde hum in de Köken,
waar dej Huusfrou an Pannkauken backen was.
„Gah sitten, Harm. Lüst du uk ein Pannkauk?“
- „Dusend Dank. Laat man. Ik hebb nett mien
Botterbrood up. Ik bin noch stoppsatt.“
„Na, dann sett di man efkes hen un drink ein
Koppke Tee. Hau is’t mit Frou un Kinder?
All flügg?“ - Ja, bestgaud. All up Stee.“
Dej beiden harrn sück völ tau vertellen un dej
Tied gung gau vörbi. Man dann was’t miteins
doodstille. Dej beiden harrn nix mehr tau
seggen. Dej Huusfrou houde de letzde Deig in
de Panne.
Un Harm see: „ Wat hest nettekraat seggt?
Off ik uk wall ein Pannkauk mag?“
Allerbest Jan
Woordverklaren:
Burinske – Bäuerin; allemachdeg – gewaltig; knieperg – geizig;
Gitzlappe – Geizhals; minn - wenig; freewat schraa – herzlich wenig, armselig;
Wicht – Mädchen; Settje – kurze Zeitspanne; minnachdeg – abfällig, gering;
Smacht – Hunger; Baul – Sache; neugen – bitten; verskeiden – verschiedene;
Saken – Sachen; offlevern – abliefern; flügg – munter, wohlauf;
bestgaud – sehr gut; all up Stee – alles in Ordnung; Deig – Teig;
nettekraat – eben, vor kurzem
Auf der Seite „Olde Tieden“ finden Sie
plattdeutsche Geschichten mit Übersetzung
und als Hörspiel von Jan Schneeberg.
www.olde-tieden.de
Tee bei NordWest · Inh. Alexandra Fokken · Neue Str. 14 · 26757 Borkum · www.tee-bei-nordwest.de
45