Simmentaler Joernaal 2013.indb

Simmentaler - Feed the World
Brokkies & Kursusse | Snippets & Courses
176
Telers slyp hul beoordelingsvaardighede
Die Namibiese Simmentalergenootskap het in Junie vanjaar ’n drie dae lange
beoordelingskursus aangebied waartydens drie telers se stoeterye besoek
is. Nie minder nie as 15 telers het die kursus bygewoon wat verskeie praktiese
demonstrasies en teoretiese lesse ingesluit het.
Van links is Chris De Jager, Gerhard Ensle, Harald Giess, Stephan Voigts, Renate Riedel,
Amos Hengura, Zebaldt Katjiteo, Reinie Rusch, Egbert Hoff, Dawid Shaanika, Fred Dell,
Thinus Cocklin, Karola van Biljon en Dewald Walters. Waldo Lottering was afwesig.
Die kursus is deur die Genootskap se tegniese adviseur,
Fred Dell, aangebied met die ondersteuning van Reinie
Rusch, Stephan Voigts en Dewald Walters.
Op dag een het die groep besoek afgelê by Rene en
Lonie Krafft. Hier het hulle ’n lesing in die toepassing en
aanwending van teelwaardes gekry. Teelwaardes word
deesdae as een van die beste hulpmiddels tot beesteelt
beskou. Die basiese beginsels van beoordeling,
Simmentaler-rasstandaarde en voortreflikheid is
ook bespreek. Alle punte is deur middel van CDS
gedemonstreer, terwyl Stephan en Dewald dit met
praktiese demonstrasies met ’n bul en koeie gestaaf het.
’n Op-die-hoef-beoordelingsessie is die namiddag deur
Reinie gelei. “Reinie het die gawe om ’n uitmuntende
praatjie te lewer, ten spyte van die bibberende koue en
almal wat soos stokmannetjies daar staan,” vertel Fred.
Op dag twee het die groep die oudste Simmentaler-stoet
in Suider-Afrika, Voigtland Simmentalers, besoek. “Die
dag het verdere praktiese demonstrasies ingesluit, terwyl
Stephan en sy vrou, Gaby, vir die innerlike versterking
gesorg het.”
Die derde dag is in die Gobabis-distrik op Bertus en
Comien Walters se plaas deurgebring. Junior kandidate
is getoets terwyl die laaste van die reeks praktiese
demonstrasies afgehandel is. “Hier is ons en die
Simmentalers baie goed versorg,” sê Fred.
Hy het ’n spesiale woord van dank uitgespreek teenoor
die telers wat hul diere beskikbaar gestel het. “Die
gees, gemoed en atmosfeer tydens die kursus was iets
besonders. Ons het almal baie geleer en ons passie vir
Simmentalers is versterk.”
Met hierdie Joernaal bedank ons graag al ons media-vennote wat gereeld oor ons
uitstekende ras beriggewing doen. Veeplaas, Farmer’s Weekly, Landbou Weekblad,
Volksblad, Ontbytsake, Agri TV en vele meer.