Simmentaler Joernaal 2013.indb

Simmentaler - Feed the World
Wetenskaplik | Scientific
82
Eet vleis en word maer
Annemarie Joubert
Agt Europese navorsingsentrums het in ’n gesamentlike studie bevind dat
’n lae GI-dieet wat hoog in proteïene is, die beste vir gewigsverlies is. Die
Skaapvleisbemarkingsforum sê in ’n verklaring dat die grootste studie wat nog ooit
in die wêreld oor diëte en vetsug onderneem is, toon dat die meeste lande se dieët-riglyne
nie in die kol is nie en onvoldoende is om vetsug te voorkom.
In dié studie, wat onder leiding van die Fakulteit van
Lewenswetenskappe (LIFE) van Kopenhagen Universiteit
onderneem is, is bevind dat mense wat gewig wil verloor
minder verfynde stysel soos brood en rys moet inneem,
en meer kos moet eet wat hoog is in proteïene, soos
maer vleis, lae vet-suiwelprodukte en bone.
Altesaam 772 families, bestaande uit 938 volwassenes
en 827 kinders, het aan die Europese Diogenes dieëtstudie
deelgeneem. Die resultate is in die New England
Journal of Medicine gepubliseer.
Die 938 oorgewig volwassenes het aanvanklik ’n dieet
om gewig te verloor gevolg waarin 800 kalorieë per dag
oor ’n tydperk van agt weke ingeneem is. Daarmee het
hulle gemiddeld elf kilogram verloor. Daarna is hulle by
vyf verskillende lae-vet dieët-tipes ingedeel wat hulle vir
ses maande moes volg, in ’n poging om te bepaal watter
dieët die mees doeltreffende is om te voorkom dat hulle
weer gewig optel.
Die diëte se proteïen-inhoud en glukemiese indeks (GI)
het verskil. GI is ’n maatstaf van die moontlikheid waaroor
koolhidrate beskik om bloedglukose-vlakke te verhoog
wanneer dit in die liggaam opgeneem word. Kos met ’n
lae glukemiese indeks (LGI) laat die bloedglukose-vlakke
stadiger en tot op laer vlakke styg in vergelyking met kos
wat hoog in koolhidrate is met ’n hoër glukemiese indeks
(HGI).
Volwassenes
Van die 938 volwassenes wat aan die studie deelgeneem
het, het 548 die hele tydperk volgehou. Die groep wat
op die hoë proteïene-dieët met ’n lae GI was, was die
enigste persone wat hul gewig gehandhaaf het ná die
aanvanklike gemiddelde verlies van 11kg. Daar was ook
meer mense wat met die dieët volgehou het in die groep.
Dit kan moontlik toegeskryf word aan die feit dat ’n
lae GI-dieët tot stadiger vertering van kos lei, sodat
die bloed se glukose-vlakke meer stabiel is en ’n
mens goed laat voel. Proteïene is ook meer vullend as
koolhidrate en vet, met die gevolg dat ’n mens nie weer
so gou honger word nie.