Estrategiak euskararen ikaskuntzan eta irakaskuntzan

2.3.1.1.5. Eskola-orduak
Aztertutako euskaltegiaren kurrikuluan (EIKP) maila bakoitzari dagokion
eskola-ordu kopurua honela zehazten dute:
«Lehenengo mailan ikaslea 600-660 orduan arituko da: 330 ordu 1A egiteko
(ikasleen maila hutsekoa bada), eta beste horrenbeste 1B egiteko. (…)
Ikasleak 300-330 ordu izango ditu bigarren maila honen helburuak lortzeko.
(…) Hirugarren mailan helburu orokorra lortzeko 300-330 ordu izango ditu
ikasleak.» (2003: 12-13).
Euskaltegi honetako ikasleak maila desberdinetan ez ezik, ikastaro
desberdinetan ere euskalduntzen dira. Alegia, IRALE eta IVAPeko
programen ikastaroak, baita Unibertsitateko enplegatuen ikastaroak ere
kenduta, aztertutako ikasleria lau ikastaro motatan banatua dago. Ikastaro
trinkoa deritzonean, ikasleek, egunean sei orduko eskolak dituzte. Ikastaro
azkarrean, ikasleek egunean lau eskola-ordu hartzen dituzte. Ikastaro
lasterrean, ikasleek egunean ordu biko eskola-orduak dituzte. Eta azkenik,
ikastaro arruntean, ordu eta erdiko eskolak dituzte, oro har, unibertsitateko
ikasleek egiten dutelarik. Horrenbestez, aztertutako 274 ikasletatik batek ez
du ezer jarri eskola-orduei dagokion hutsunean; 7k, ikastaro trinkoa
markatu dute; 42 ikastaro azkarrean aritu dira; 108 lasterrean, eta 116
arruntean.
135