Editorial - Quickborn. Vereinigung für niederdeutsche Sprache und ...

Ut’n Quickborn
Wi freit uns ok, wat Wolfgang Müns uns den tweeten dicken Band vun Festschriften
op’n Disch packt hett, de wi eerst vör’n poor Doog verschickt hebbt.
To so een Jubiläum steiht uns dat good, wenn wi uns’ Geschichte ünnerseukt
un kloke Lüüd wat schrieben dot. Wi dankt jüm all düchtig, denn se hebbt dat
je för lau mookt un dor keenen Cent för verlangt un kregen.
Dat Geld för dat Book hebbt wi tohoop kleit vun twee Johr 2007/2008. Un so is
dat een Johrsgoov för disse beiden Johren.
Wi seggt Jo nu al to, wat wi anner Johr wiss wedder een Book mit plattdüütsche
Texten rutgeevt un de Wetenschop eerstmol ’n Paus moken deit!
Uns’ Vörstand un ok de Redaktion hebbt sik 2007 man blots dreemol dropen.
Sunsten ober ok noch bi de Gelegenheit vun de Obenden in de Nedderdüütsche
Bibliothek un in’n Lichtwarksool, bi de Beukermesse un bi Lesungen,
in’t Ohnsorg, bi enkelte Vördrääg oder in de Kark to’n plattdüütschen Gottesdeenst,
wo sik allerwogens Lidmoten infunnen hebbt.
Klor, wat wi as Quickborn-Lüüd ok noch no anner Ecken feuhrt sünd, wo wi
mitmookt hebbt. Dor heurt de Fritz-Reuter-Doog to, de letzt Johr in Lulu weurn,
dor heurt de Bevensen-Dagfohrt un de KlausGroth-Doog mit to. De Pastoralkollegs
vun de Pasters un de Priesen, wo ok uns’ Moten fein wat afkregen
hebbt.
2007 hett Corl Groth bi ‚Vertell doch mal‘ Platz twee kregen. Sien Geschicht
hebbt wi in’t letzt Heft afdruckt. Thomas Stelljes hett den ‚Borsla-Pries‘ 2007
kregen, den sik twee Lüüd delen müssen. Un uns’ Quickborn hett den ‚Fritz-
Reuter-Literaturpries‘ vun’t ‚Fritz-Reuter-Literaturmuseum‘ in Stemhogen un
vun de Stadt Stemhogen in de Hand kregen.
Dat geev een fein Bild vun de Stadt, dat Werner Schinko mookt hett, un ’n
poor Doler in de Kass. Een feinen Obend hebbt wi in‘t Slott vun Stemhogen
hatt, wat je in Reuter sien ‚Franzosentied‘ mitspeelt. Wi sünd dor mit een grote
Delegation henfeuhrt un hebbt uns alltohoop höögt.
Ok för dit Johr is al wedder ’n Barg mit Priesen anseggt: Uns‘ ‚Radio 90,3-
Gerd‘ schall je den gröttern ‚Fritz-Reuter-Pries‘ kriegen, den vun de Carl-
Toepfer-Stiftung. De ward em an’n 12. April in’t Liebermann-Studio vun’n NDR,
wo ok ‚Sonntakte‘ passeert, öbergeben. Un wiss sünd dor’n poor vun uns mit
bi!
Ok uns’ egen Pries, de ‚Quickborn-Pries 2008‘, schall wedder öbergeben
warrn. Un wi hebbt jüst ganz frisch den Minschen utkeken, de wunnen hett:
Dat is Prof. Dr. Jürgen Meier, ‚de vun‘t Hambörger Lexikon’!
Wi ward den Pries, de je vun de ‚Sporkassenstiften Neddersassen‘ betohlt
ward, wedder op’n Kiekebarg bi Horborg öbergeben. Dat schall an’n 31. Mai,
vörmiddags Klock 11, losgohn.
102
Quickborn108-1.Korr. 102
25.03.2008, 9:06 Uhr