'n begeesterde span - Distell

18
OORSIGTE VOORSITTERSVERSLAG
Voorsittersverslag
was wat ’n verandering in grondbesit teweeggebring het nie.
Distell is by sommige van hierdie projekte betrokke, onder
andere die Papkuilsfontein- en die Uylenkraal-onderneming,
asook die Noord-Kaap/Vrystaat-Wingerdvestigingsmaatskappy.
Laasgenoemde is ’n bemagtigingsprojek wat plaaslike gemeenskappe
in die Noord-Kaap betrek. Dit is deur Distell geïnisieer
en gestruktureer, en verskeie ander rolspelers in die wynbedryf,
soos Winetech en die SA Wynbedryftrust, is ook daarby
betrokke. Verdere inligting oor hierdie onderneming kan gevind
word op bl. 41 van ons Volhoubaarheidsverslag.
Hoewel ons steeds nuwe soortgelyke geleenthede ondersoek,
moet in gedagte gehou word dat bates met hoë waardes en lae
opbrengste, tesame met ’n produk wat in ’n uiters kompeterende
mark meeding, beteken dat volhoubare transformasie
slegs moontlik is in ’n omgewing van sterk groei gerugsteun
deur die ontwikkeling van menslike hulpbronne. Dit is om
dié spesifieke rede dat al ons bemagtigingsprojekte, of dit die
oordrag van grond behels of nie, hoofsaaklik fokus op die
ontwikkeling van vaardighede.
Vordering is ook gemaak in die ontwikkeling van ’n Drankbedryf-
SEB-handves, waarin Distell ’n leidende rol speel, en die
ontwikkeling van ’n Wynbedryfhandves. Beide prosesse loop
parallel, met onderlinge koördinasie, maar kan eers voltooi word
wanneer die Departement van Handel en Nywerheid die kodes
vir goeie praktyke gefinaliseer het. Dié kodes sal aandui wat die
regering verwag van alle SEB-handveste.
Wetgewing
Distell is in ’n goeie posisie om sy verpligtinge na te kom wat
voortspruit uit die nasionale Drankwet, wat reeds byna ’n jaar in
werking is. Dié wet vereis dat vervaardigers en verspreiders van
alkoholiese drank by die Minister van Handel en Nywerheid vir
’n hersiening van hul registrasies moet aansoek doen, wat
beoordeel sal word aan die hand van mededingende optrede,
hul verbintenis tot SEB en die veldtog teen alkoholmisbruik.
Provinsiale drankwetgewing het nie gevorder teen die tempo,
soos deur die bedryf vereis nie, en huidiglik het slegs KwaZulu-
Natal, die Oos-Kaap en Gauteng wetgewing in plek. Die
Gautengse wetgewing is egter in ’n aantal wesenlike opsigte
gebrekkig. Die bewoording en die administrasie van die
wetgewing wat poog om die drankbedryf te reguleer, is ver
verwyder van die werklikhede van die bedryf. Dit veroorsaak
verwarring en moedig die verontagsaming van die wet aan.
Gevolglik was ’n aantal partye genoodsaak om regsaksies in te
stel om die aangeleentheid behoorlik aan te spreek.
Verantwoordelike drankgebruik
Ons glo dat drankmisbruik en drankgebruik deur minderjariges
beter aangespreek word deur holistiese maatreëls wat vatbare
groepe identifiseer en met geskikte ingrypings bystaan. Sulke
ingrypings sluit in die opvoeding van verbruikers en programme
oor lewensvaardighede; om lisensiehouers op te lei oor hoe ’n
kultuur van matigheid onder hul klante ontwikkel en gevestig kan
word; om berading aan misbruikers te verskaf en hulle te
rehabiliteer; en deur die implementering van verantwoordelike
advertensies, verpakking, promosies en verkope. Dit is die aanslag
wat gevolg word deur ons nywerheidsliggaam, die Bedryfsvereniging
vir Verantwoordelike Alkoholgebruik (BVA), waarvan
ons ’n toonaangewende lid is. Die BVA vorm die grondslag vir die
daarstelling van ons vennootskappe en uitvoering van ons
strategieë in ons handelinge met die Regering op plaaslike en
nasionale vlak. Besonderhede hiervan kan gevind word op
bladsy 39 van ons Volhoubaarheidsverslag.
Algemeen
Die inisiatief wat twee jaar gelede begin is om alle afdelings van
die wynbedryf in ’n enkele liggaam te koördineer, die SA Wyn- en
Brandewynmaatskappy, het ongelukkig nie die beoogde sukses
behaal nie. Daar word gehoop dat alle rolspelers ’n beter basis
vir konsensus sal vind om sodoende verbeterde koördinering
tussen alle fasette van die bedryf toe te laat. Ondanks die gebrek
aan eenstemmigheid is die verskillende liggame in die bedryf –
wat belas is met spesifieke take soos uitvoere, navorsing en
versameling en verspreiding van data – onverpoos besig en hul
werk bly van kritiese belang in die bestuur en leiding om groei in
die bedryf te behaal.
DISTELL JAARVERSLAG 2005