'n begeesterde span - Distell

Rekeningkundige beleid en definisies
1. Rekeningkundige beleid
Die groep se rekeningkundige beleid voldoen aan
Standpunte van Algemeen Aanvaarde Rekeningkundige
Praktyk in Suid-Afrika effektief vir die groep
se finansiële jaar. Hierdie beleid is, behalwe vir die
amortisasie van klandisiewaarde, in ooreenstemming
met dié van die vorige jaar. Veranderings word
behandel in aantekening 32.
Die finansiële jaarstate is volgens die historiesekostegrondslag
opgestel, soos gewysig deur die aanpassing
van biologiese bates en van sekere finansiële
instrumente tot billike waarde.
1.1 Grondslag van konsolidasie
Filiaalmaatskappye
Filiale, wat maatskappye is waarin die groep, direk of
indirek, ’n belang van meer as die helfte van die
stemreg hou of andersins oor die vermoë beskik om
beheer oor die bedrywighede uit te oefen, is gekonsolideer.
Die aankoopmetode van teboekstelling word
gebruik om die verkryging van filiale te verantwoord.
Die resultate van enige filiale verkry of verkoop
gedurende die jaar is ingesluit vanaf die datum waarop
effektiewe beheer verkry is, tot op die datum waarop
effektiewe beheer beëindig is. Alle intergroeptransaksies,
-balanse en ongerealiseerde winste en
verliese word met konsolidasie uitgeskakel. Waar
nodig, is die rekeningkundige beleid van filiale aangepas
om konsekwentheid met dié van die groep te
verseker. Minderheidsbelange word afsonderlik
geopenbaar.
’n Lys van die groep se vernaamste filiale word in
aanhangsel 1 by die finansiële jaarstate verstrek.
Geassosieerde maatskappye
Beleggings in geassosieerde ondernemings word
volgens die ekwiteitsmetode verantwoord. Hierdie is
ondernemings waarin die groep tussen 20% en 50%
van die stemreg hou en waar die groep oor
beduidende invloed beskik, maar nie beheer uitoefen
nie. Ekwiteitsverantwoording behels die erkenning in
die inkomstestaat van die groep se aandeel in die
geassosieerde se wins of verlies vir die jaar. Die groep
se belang in die geassosieerde word in die balansstaat
getoon teen ’n bedrag wat die groep se aandeel in
die netto bates van die geassosieerde weerspieël.
Klandisiewaarde met verkryging word apart getoon.
Permanente waardedalings word voorsien.
’n Lys van die groep se geassosieerdes word in
aanhangsel 2 by die finansiële jaarstate verstrek.
Gesamentlike ondernemings
Die groep se belang word verantwoord deur van die
proporsionelekonsolidasie-metode gebruik te maak.
DISTELL JAARVERSLAG 2005
Volgens hierdie metode word die groep se
toeskryfbare gedeelte van inkomste, uitgawes,
bates en laste op ’n lyn-vir-lyn-grondslag by die
finansiële jaarstate van die groep ingesluit.
Verdere besonderhede van die gesamentlike
ondernemings word in aanhangsel 3 by die finansiële
jaarstate verstrek.
1.2 Eiendom, aanleg en toerusting
Grond en geboue word teen historiese koste verantwoord.
Geboue word volgens die reguitlynmetode oor
hulle verwagte nuttige lewensduur afgeskryf.
Verbeterings aan gehuurde eiendomme word oor die
termyne van die huurkontrakte afgeskryf.
Masjinerie, toerusting en voertuie word teen historiese
koste verantwoord en volgens die reguitlynmetode
oor die verwagte nuttige lewensduur afgeskryf.
Gekapitaliseerde bruikhure is bates wat ingevolge ’n
finansieringsbruikhuurooreenkoms gehuur word. Dit
word gekapitaliseer teen die ekwivalente kontant
koopprys en volgens die reguitlynmetode oor die
verwagte nuttige lewensduur afgeskryf. Bruikhuurfinansieringskoste
word oor die tydperk van die
bruikhuur volgens die effektiewerentekoers-metode
afgeskryf. Die huur van bates waarvan alle risiko’s en
vergoeding verbonde aan eiendomsreg effektief
deur die verhuurder behou word, word as bedryfshure
geklassifiseer. Betalings ten opsigte van
bedryfshure word teen normale inkomste verreken.
Winste en verliese met die verkoop van eiendom,
aanleg en toerusting word bepaal met verwysing na
hul drabedrag en word in ag geneem by die bepaling
van bedryfswins.
Sagtewarepakkette en die direkte ontwikkelings- en
installeringskoste daaraan verbonde, word gekapitaliseer
en oor die verwagte nuttige lewensduur,
vanaf die datum van ingebruikneming, afgeskryf.
Waar die drabedrag van ’n bate groter is as sy
verwagte verhaalbare bedrag, word die waardedaling
erken en die bate dadelik afgeskryf na sy
verhaalbare bedrag.
Finansieringskoste op geleende fondse om die konstruksie
van eiendom, aanleg en toerusting te finansier
word teen bedryfskoste verreken soos aangegaan.
1.3 Biologiese bates
Biologiese bates bestaan uit wingerde wat waardeer
word teen billike waarde deur die netto kontantvloeie
te verdiskonteer oor die oorblywende lewensduur
daarvan teen ’n toepaslike verdiskonteringskoers.
Winste en verliese wat ontstaan met die
verandering in billike waarde word teen inkomste
verreken in die tydperk waarin dit ontstaan.
59
JAARSTATE REKENINGKUNDIGE BELEID