carroll, lewis - la aventuroj de alico en mirlando.pdf

ĈAPITRO VIII
LA KROKETLUDEJO DE LA REĜINO
GRANDA rozarbo staris apud la enirejo
de la ĝardeno: la rozoj kreskantaj sur ĝi
estis blankaj, sed tri ĝardenistoj rapide
kolorigadis ilin ruĝaj. Alico opiniis tion tre
kurioza, kaj ŝi proksimiĝis por rigardi, kaj,
ĝuste kiam ŝi estis apud ili, ŝi aŭdis unu
el ili diri, “Atentu, do, Kvin! Ne verŝu
farbon sur min tiel!”
“Ne mi kulpas,” diris Kvin, per paŭta
tono; “Sep frapis mian kubuton.”
Je tio Sep suprenrigardis kaj diris,
“Jes, ja, Kvin! Ĉiam akuzu aliajn!”