Jaitsi hemen liburu osoa - Lezoko Unibertsitateko Udala

Lezo: ondarea eta hiri garapena
3.1 INDUSTRIA LEZON: HASTAPENETATIK 1950ERA ARTE
Lezo industrializazio prozesuan murgiltzeko arrazoien artean, nabarmentzekoak
dira portuaren eta trenbidearen gertutasuna, industria lurzoruaren
eskaintza eta komunikazio sareekiko kokapen egokia. Izan ere, Lezon
kokatutako lantegiek ezinbesteko baliabide guztiak zituzten: trenbideak lehengaiak
ekarri, eta Jaizkibelek ur hornikuntza bermatzen zuen. Bestalde,
Andoain–Irun errepidearen eraikuntzak eta trenbideak erraztu zuten industria lurzorua
sortzea.
Industrializazio prozesua, Errenterian, XIX. mendearen erdialdera hasi eta
Lezoraino zabaldu zen; ondorioz, hainbat jarduera ezarri ziren bertan. Halaber,
Errenteriako lantegi batzuek Lezon zituzten instalazio osagarriak. Sociedad de
Tejidos de Lino lantegiak, esaterako, zortzi ehundegi instalatu zituen.
Hartara, Lezo, batzuetan, protagonista zuzena zen, eta bestetan, industriarako
beharrezkoak ziren baliabideak –ura, lehengaiak, garraioa, eskulana, etab.- baino
ez zizkien eskainiko ondoko udalerriei.Real Compañía Asturiana de Minas
enpresa, Lezon egon ez arren, erabakigarria izan zen udalerriarentzat, eta ia
hasieratik eragin zituen kutsadura arazoak. 1870. urtean jada, Lezoko Udalak
kexa bat aurkeztu zuen Batzar Nagusien aurrean, fabrikaren emanazioek Lezoko
soroetan eragiten zituzten kalteak zirela eta. Aldundiak emanazioak murrizteko
beharrezkoa zen makineria eskuratzeko eskatu zion konpainiari. Alabaina, garai
hartan, ezer gutxi egin zitekeen horrelako enpresa garrantzitsu baten aurrean 39 .
Real Compañía Asturiana de Minas. Pasaiako Portuko Agintaritzaren argazki-artxiboa.
60
39 LUA: A-7-1-1