Jaitsi hemen liburu osoa - Lezoko Unibertsitateko Udala

HITZAURREA:
Herri baten ondarearen ikerketak ezustekoak eman ohi ditu. Are gehiago, ikergaia
egunero ikusten dugun ondarea baldin bada; alegia, lanera edo ogitara goazenean
ikusten dugun paisaia bada. Gure eguneroko joan-etorrietan ez da erraza
konturatzea behin eta berriz ikusten dugun pareta horma hutsa den edo,
horrez gain, eraikin esanguratsu baten zatia den. Aurrean dugun eraikina garrantzitsua
izan daiteke estiloarengatik, duen historiarengatik, bertan bizi zirenen bizipenengatik,
diseinatu zuen arkitektoarengatik, edota herriak berak ez botatzea
erabaki zuelako, besterik gabe.
Orain aurkezten ari garen liburua ez da salbuespena, ezustekoei dagokienez.
Ikerketa honen hasierako asmoa Lezoko ondare arkitektonikoa aurkeztea zen;
hain zuzen ere, baserri guneetako arkitektura zibila; alegia, gure baserriei buruz
hitz egitea, artearen eta historiaren ikuspegitik.
Hala ere, errealitatea egoskorra izaten da. Eta XXI. mendeko Lezoren lekuko
arkitektonikoek, gure komunitatearen lehenaldia eta batez ere azken hamarkadetako
historia ulertzeko laguntza paregabea eskaintzen diguten horiexek, herriguneko
eraikinak eta eraikin industrialak dira. Aitortu behar da, hala ere, lan hau
duela hogei urte egin balitz –eta zer esanik ez duela berrogei urte idatzi balitz–,
landa edo baserri guneetako arkitekturak askoz ere protagonismo handiagoa
zukeela. Baina liburu hau idatzi duten bi ikertzaileek, Beatriz Herreras eta Josune
Zalduak, uste gabeko ondare aberastasuna ikusi zuten gutako gehienok etxe
zaharrak edo pabilioi zikinak baino ikusiko ez genituzkeen lekuetan.
Hala, bada, Herreras eta Zalduak, Lezoren irudi ezagun eta errepikatuenez
gain, arkitekturarekin eta batzuetan ingeniaritzarekin lotutako ondare hori ekarri
digute gogora, ez baitakigu beti behar bezala baloratzen. Gure herriko elementu
berezienen deskripzio zehatza egin dute, eta hainbat artista, arkitekto eta disei-