Alternative Funeral Service - Yr Eglwys yng Nghymru

Gwasanaethau Angladd
GWEDDÏAU WRTH DDYFOD YNGHYD
1.
O Dduw ein nodded a’n nerth,
yr wyt yn agos atom yn ein trallod;
tyrd i gwrdd â ni yn ein galar a dyrchafa ein llygaid
at dangnefedd a goleuni dy ofal gwastadol drosom.
Cynorthwya ni felly i glywed geiriau dy ras
fel y diddyma dy gariad ein hofn,
yr esmwytha dy bresenoldeb ein hunigrwydd
ac yr adnewydda dy addewidion ein gobaith
yn Iesu Grist ein Harglwydd. Amen.
2.
Dad grasol,
cynorthwya ni
mewn tywyllwch a goleuni,
mewn trallod a llawenydd
i ymddiried yn dy gariad,
i wasanaethu dy bwrpas
ac i foliannu dy enw;
trwy Iesu Grist ein Harglwydd. Amen.
3.
Dad nefol,
fe’n gwnaethost nid i dywyllwch a marwolaeth,
ond i fyw gyda thi am byth.
Hebot nid oes gennym ddim i obeithio amdano;
gyda thi, nid oes gennym ddim i’w ofni.
Llefara wrthym yn awr eiriau dy fywyd tragwyddol.
Cyfod ni o boen meddwl ac euogrwydd
i oleuni a thangnefedd dy bresenoldeb,
a gosod ogoniant dy gariad o’n blaen;
trwy Iesu Grist ein Harglwydd.
Amen.
GWEDDÏAU O EDIFEIRWCH
Kyrïau
4.
Cofia, Arglwydd, dy drugaredd a’th ffyddlondeb,
oherwydd y maent erioed.
Arglwydd, trugarha. (Arglwydd, trugarha.)
Paid â chofio pechodau fy ieuenctid na’m gwrthryfel,
ond yn dy gariad cofia fi,
er mwyn dy ddaioni, O Arglwydd.
Crist, trugarha. (Crist, trugarha.)
Cadw fi a gwared fi;
na ddoed cywilydd arnaf, oherwydd ynot ti yr wyf yn llochesu.
Arglwydd, trugarha. (Arglwydd, trugarha.)
Tudalen 53