Alternative Funeral Service - Yr Eglwys yng Nghymru

Gwasanaethau Angladd
IX. GWASANAETH YN Y CARTREF AR ÔL YR ANGLADD
Gellir addasu’r gwasanaeth hwn i’w ddefnyddio naill ai’n union wedi’r Angladd neu’n
ddiweddarach. Gall cyfaill, aelod o’r teulu neu weinidog ei arwain.
WRTH Y DRWS
Gall y gweinidog ddweud
Yn enw’r Tad a’r Mab a’r Ysbryd Glân. Amen.
Bydded tangnefedd Duw ein Tad nefol, ac Iesu Grist ffynhonnell heddwch, a’r Ysbryd Glân y
diddanydd ar y tŷ hwn a phawb sy’n preswylio ynddo.
Agor, O Dduw, ddrws y tŷ hwn; llewyrched dy oleuni yma i ymlid ymaith bob tywyllwch; trwy
Iesu Grist ein Harglwydd. Amen.
GAIR DUW
Gellir defnyddio un neu ragor o’r darlleniadau a ganlyn:
Ioan 14.1-3
Mathew 11.28-30
Philipiaid 3.20 - 4.1
Salm 71.1-6, 17-18.
Salm 126. 5-6.
Salm 139. 7-11.
GWEDDÏAU
Gellir defnyddio gweddi neu weddïau addas allan o Adran XI, neu fe all y bydd gweddïau
anffurfiol dros y teulu yn fwy priodol. Gall y weddi hon fod yn arbennig o addas os darperir
lluniaeth ar ôl yr Angladd.
Hollalluog Dduw, Tad ein Harglwydd Iesu Grist, yr adnabu ei ddisgyblion ef wrth iddo dorri’r
bara wrth eu bwrdd ar ôl yr atgyfodiad: diolchwn iti am dy nerth i’n cynnal yn yr hyn a
wnaethom heddiw, a gofynnwn yn awr am i’th bresenoldeb gael ei gydnabod yn y cartref hwn;
dwg dy dangnefedd a’th lawenydd i bob lle sy’n cyffroi’r cof; dyro dy nerth a’th bresenoldeb
yn y tasgau beunyddiol hynny a rennid gynt; ac yn holl droeon bywyd dyro inni ras i wneud
dy ewyllys ddydd ar ôl dydd, ac i ddisgwyl am ddyfodiad gogoneddus Crist, pan gesgli ni
ynghyd at dy fwrdd yn y nefoedd i fod gyda thi byth bythoedd. Amen.
DIWEDDGLO
Gall y gweinidog ddweud rhan o Salm 121 neu’r cyfan ohoni.
Tudalen 45