Alternative Funeral Service - Yr Eglwys yng Nghymru

Gwasanaethau Angladd
IV. GWYLFA ANGLADD
Gall yr wylfa fod yn rhan o wasanaeth yn yr eglwys cyn yr Angladd, neu gall fod yn wasanaeth
gwahanol. Gall fod yn yr eglwys, yn y cartref, neu mewn man addas arall, megis capel ysbyty.
Gellir hefyd ei defnyddio ar gyfer aelodau o’r teulu neu gyfeillion agos na allant, oherwydd
gwaeledd neu resymau o’r fath, ddod i’r Angladd. Os yw’r wylfa yn rhan o wasanaeth arall,
gellir hepgor y Dod Ynghyd a’r Diweddglo.
Y DOD YNGHYD
Arglwydd, agor ein gwefusau: a’n genau a fynega dy foliant.
Bendigedig wyt ti, Dduw trugaredd a chariad, bugail ac amddiffynnydd dy bobl alarus, eu
dechrau a’u diwedd. Arwain ni i fan lle y mae tangnefedd ac adfywhad; tywys ni at ffynhonnau’r
dyfroedd bywiol; sych ymaith bob deigryn o’n llygaid a dwg ni i’r nefoedd lle nad oes marw
mwyach, na galar nac wylo na phoen yn dy wyddfod di, Dad, Mab ac Ysbryd Glân:
Bendigedig fyddo Duw am byth.
Iesu Grist ddoe a heddiw, y dechrau a’r diwedd, yr Alffa a’r Omega ; iddo ef y perthyn yr holl
amseroedd ac oesoedd; iddo ef y bo’r gogoniant a’r gallu ym mhob oes ac am byth. Amen.
Os cyneuir canhwyllau:
Bydded i oleuni Crist yn cyfodi mewn gogoniant ymlid pob tywyllwch o’n calonnau a’n
meddyliau.
DARLLENIAD NEU DDARLLENIADAU ADDAS
Y mae awgrymiadau yn dilyn:
Sicrwydd a Diddanwch
Yr Hen Destament: Eseia 61.1-3. Cysuro pawb sy’n galaru
Salm: 139
Salm-weddi: Arglwydd, ti sydd wedi ein creu a’n llunio, yr wyt wedi ein chwilio a’n hadnabod,
yr wyt bob amser gyda ni mewn goleuni a thywyllwch: cynorthwya ni i adnabod dy
bresenoldeb yn y bywyd hwn ac, yn y bywyd a ddaw, i barhau i fod gyda thi, lle’r wyt yn fyw
ac yn teyrnasu, yn Dduw am byth. Amen.
Y Testament Newydd: I Pedr 1.3-9. Ganwyd ni o’r newydd i obaith bywiol
Cantigl: Cân Plant Duw
Efengyl: Ioan 14.1-6. Yn nhŷ fy Nhad y mae llawer o drigfannau
Gweddi.
Ffyddlondeb Duw
Yr Hen Destament: Eseia 53.1-10. Y gwas dioddefus
Salm: 116.1-8 (9-17)
Salm-weddi: Arglwydd bywyd, rhodiwn drwy dragwyddoldeb yn dy ŵydd. Arglwydd
marwolaeth, galwn arnat mewn gofid a galar: ac yr wyt ti yn ein clywed a’n hachub. Gwylia
drosom wrth inni alaru am dy was/wasanaethferch, a oedd yn werthfawr yn dy olwg, a chadw
ni’n ffyddlon i’n haddunedau i ti. Amen.
Y Testament Newydd: Rhufeiniaid 8.31-diwedd. Ni all dim ein gwahanu oddi wrth gariad
Crist
Datguddiad 21.1-7. Wele, yr wyf yn gwneud pob peth yn newydd
Cantigl: Cân y Rhai a Gyfiawnhawyd
Efengyl: Ioan 6.35-40(53-58). Bydd pob un y mae’r Tad yn ei roi i mi yn dod ataf fi
Gweddi.
Tudalen 30