Alternative Funeral Service - Yr Eglwys yng Nghymru

Gwasanaethau Angladd
BENDITHION A DIWEDDIADAU ERAILL
71.
Ac yn awr iddo ef
sydd â’r gallu ganddo i’n cadw rhag syrthio,
a’n codi o ddyffryn tywyll anobaith
i fynydd disglair gobaith,
o ganol nos trallod
i wawrddydd llawenydd,
iddo ef y bo’r gallu a’r awdurdod yn oes oesoedd. Amen.
72.
Duw fo yn fy mhen
a’m hymresymiad;
Duw fo yn fy nhrem,
ac yn f’edrychiad;
Duw fo yn fy ngair
ac yn fy siarad;
Duw fo yn fy mron
ac yn fy nirnad;
Duw ar ben fy nhaith,
ar f’ymadawiad. Amen.
73.
Bydded i Grist y bugail da eich lapio yn ei gariad,
eich llenwi a thangnefedd,
a’ch tywys mewn gobaith gydol eich dyddiau;
a bendith Duw hollalluog,
y Tad a’r Mab a’r Ysbryd Glân,
a fo yn eich plith ac a drigo gyda chwi yn wastad. Amen.
74.
Bydded i gariad Duw a thangnefedd ein Harglwydd Iesu Grist
eich cysuro a sychu ymaith yn dyner bob deigryn o’ch llygaid.
Bendithied yr Hollalluog Dduw chwi,
Dad, Mab ac Ysbryd Glân. Amen.
75.
Bydded i’r Duw tragwyddol
ein bendithio a’n cadw,
amddiffyn ein cyrff, achub ein heneidiau
a’n dwyn yn ddiogel i’r wlad nefol,
ein cartref tragwyddol,
lle y mae’r Tad a’r Mab a’r Ysbryd Glân yn teyrnasu,
yn un Duw byth bythoedd. Amen.
Tudalen 72