Alternative Funeral Service - Yr Eglwys yng Nghymru

Gwasanaethau Angladd
68.
Dduw ein creawdwr a’n prynwr,
trwy dy allu fe orchfygodd Crist farwolaeth
a dychwelyd atat mewn gogoniant,
yn dwyn yn ei gorff olion ei ddioddefaint.
Mewn hyder yn dy fuddugoliaeth
a chan hawlio dy addewidion,
yr ydym yn ymddiried E. i’th ofal
yn enw Iesu ein Harglwydd,
sydd, er iddo farw, yn awr yn fyw
ac yn teyrnasu gyda thi a’r Ysbryd Glân,
yn un Duw yn awr ac am byth. Amen.
69.
Dad nefol,
wrth iti ein dwyn wyneb yn wyneb â’n marwoldeb,
diolchwn i ti am iti ein llunio ar dy ddelw dy hun
a rhoddi inni ddoniau corff, meddwl ac ysbryd.
Diolchwn iti yn awr wrth inni anrhydeddu’r coffa am E.,
a roddaist inni ac a gymeraist ymaith.
Ymddiriedwn ef/hi i’th drugaredd,
a gweddïwn ar iti ddangos inni lwybr y bywyd,
a chyflawnder llawenydd yn dy ŵydd
trwy holl dragwyddoldeb. Amen.
70.
Hollalluog Dduw,
yn dy gariad mawr
lluniaist ni â’th ddwylo
ac anadlu inni fywyd trwy dy Ysbryd.
Er inni fod yn bobl wrthryfelgar,
ni chefnaist arnom yn ein pechod.
O’th dyner drugaredd
anfonaist dy Fab
i’n hadfer ar dy ddelw.
Mewn ufudd-dod i’th ewyllys
rhoes ef ei fywyd drosom,
a dwyn yn ei gorff ein pechodau ar y groes.
Trwy dy allu nerthol
cyfodaist ef o’r bedd
a’i ddyrchafu i orsedd y gogoniant.
Gan ymlawenhau yn ei fuddugoliaeth
a chan ymddiried yn dy addewid
i fywhau pawb sy’n troi at Grist,
cyflwynwn E. i’th drugaredd,
ac ymunwn â’th holl bobl ffyddlon
ac â holl gwmpeini’r nef
yn yr un gân dragwyddol o foliant:
y gogoniant a’r doethineb a’r gallu
a fo i’n Duw ni yn oes oesoedd. Amen.
Tudalen 71