Alternative Funeral Service - Yr Eglwys yng Nghymru

Gwasanaethau Angladd
48.
Hollalluog Dduw, gweddïwn y bydd inni,
wedi ein calonogi gan esiampl dy saint,
redeg heb ddiffygio yr yrfa a osodwyd o’n blaen,
gan gadw ein golwg ar Iesu, awdur a pherffeithydd ein ffydd;
fel yr ymunom yn y diwedd â’r rhai a garwn
yn dy bresenoldeb di lle y mae cyflawnder llawenydd;
trwy Iesu Grist ein Harglwydd. Amen.
49.
Hollalluog Dduw,
amgylchynaist ni â chwmwl mawr o dystion.
Megis y nerthaist hwy,
ysbrydola ni i fwrw o’r neilltu bob rhwystr
a’r pechod sy’n ein maglu mor rhwydd.
Megis y cynhaliaist hwy,
cadw ni i redeg yn y ras sydd o’n blaen,
a’n golwg ar Iesu, awdur a pherffeithydd ein ffydd.
Clyw ni wrth inni offrymu gyda hwy
yn nerth yr Ysbryd tragwyddol
ein cân ddiddiwedd o foliant,
trwy Iesu Grist ein Harglwydd. Amen.
50.
O Dad,
dy Fab yw ffynhonnell iachawdwriaeth dragwyddol
pawb a’i dilyno.
Pan demtir ni i droi ymaith o’th ffordd,
dyro inni ufudd-dod Crist, ein brawd.
Pan staenir ein cydwybod gan bechod,
iachâ ni ag aberth Crist, ein hoffeiriad.
Pan fyddwn yn ofni marw, ac yn ofni marw o’r rhai a garwn,
nertha ni o wybod i Grist fynd o’n blaen
a dyfod i’th wyddfod sanctaidd,
wedi ei goroni â gogoniant ac anrhydedd,
lle y mae’n fyw ac yn teyrnasu gyda thi a’r Ysbryd Glân,
yn un Duw yn awr a byth. Amen.
51.
Dduw tragwyddol,
Y dywedodd dy Fab Iesu Grist,
“Peidiwch â gadael i ddim gynhyrfu eich calon”
ac “Nac ofnwch”,
tynn ymaith oddi wrthym ofn marwolaeth;
dwg ni i’r lle yr aeth ef i’w baratoi inni;
a dyro inni ei dangnefedd am byth. Amen.
Tudalen 64