Alternative Funeral Service - Yr Eglwys yng Nghymru

Gwasanaethau Angladd
Yr ydym yn credu i Iesu farw ac atgyfodi, felly hefyd bydd Duw, gydag ef, yn dod â’r rhai a
hunodd drwy Iesu. Felly byddwn gyda’r Arglwydd yn barhaus. Calonogwch eich gilydd,
felly, â’r geiriau hyn.
(I Thesaloniaid 4.14, 17b,18)
Ni ddaethom â dim i’r byd, ac felly hefyd ni allwn fynd â dim allan ohono. Yr Arglwydd a
roddodd, a’r Arglwydd a ddygodd ymaith. Bendigedig fyddo enw’r Arglwydd.
(I Timotheus 6.7, Job 1.21b)
Mewn gweinyddiad o’r Cymun Bendigaid:
Dywedodd Iesu, “Y mae gan y sawl sy’n bwyta fy nghnawd i ac yn yfed fy ngwaed i fywyd
tragwyddol, a byddaf fi’n ei atgyfodi yn y dydd olaf”. (Alelwia !) (Ioan 6.54)
RHAI TESTUNAU Y GALL Y GWEINIDOG EU DEFNYDDIO
DERBYN YR ARCH
Derbyniwn gorff ein brawd/chwaer E. gyda hyder yn Nuw, rhoddwr bywyd, a gyfododd yr
Arglwydd Iesu o blith y meirw.
TAENELLU DŴR AR YR ARCH
Â’r dŵr hwn cofiwn fedydd E. Megis yr aeth Crist trwy ddyfroedd dyfnion marwolaeth er ein
mwyn, dyged ni felly i gyflawnder bywyd yr atgyfodiad gyda E. a phawb a brynwyd.
Neu
Caniatâ, O Arglwydd, fod i ni a fedyddir i farwolaeth fy Fab, ein Hiachawdwr Iesu Grist,
farwhau’n wastad ein dyheadau drygionus, a chael ein claddu gydag ef; a thrwy’r bedd a
phorth angau fynd ymlaen i’n hatgyfodiad llawen; trwy ei haeddiannau ef, a fu farw ac a
gladdwyd, ac a gyfododd drachefn er ein mwyn, dy Fab Iesu Grist ein Harglwydd. Amen.
GOSOD GORCHUDD DROS YR ARCH
Yr ydym eisoes yn blant Duw, ond ni ddatguddiwyd eto beth a fyddwn. Eto fe wyddom pan
ymddengys Crist y byddwn yn debyg iddo, oherwydd cawn ei weled fel y mae.
Neu
Ar Fynydd Seion fe symuda Duw y gorchudd o alar sy dros yr holl genhedloedd. Fe ddinistria
angau am byth, a sychu ymaith y dagrau oddi ar bob wyneb.
GOSOD BEIBL AR YR ARCH
O Arglwydd Iesu Grist, dwg dy air bywiol ac anfarwol ni i enedigaeth newydd. Hysbyswyd yn
y Beibl dy addewidion tragwyddol i ni ac i E.
GOSOD CROES AR YR ARCH
O Arglwydd Iesu Grist, o gariad at E. ac at bob un ohonom dygaist ein pechodau ar y groes.
BENDITHIO BEDD
O Dduw, y gosodwyd dy Fab Iesu Grist mewn bedd: bendithia, gweddïwn arnat, y bedd hwn
i fod yn lle y gall corff E. dy was/wasanaethferch orffwyso mewn tangnefedd, trwy dy Fab
sy’n atgyfodiad ac yn fywyd, a fu farw ac sy’n fyw ac yn teyrnasu gyda thi yn awr a hyd byth.
Amen.
Tudalen 34